«Առաջին լրատվական»-ի զրուցակիցն է Արցախի Հեղափոխական կուսակցության նախագահ Արթուր Օսիպյանը։
-Պարոն Օսիպյան, Արցախի Անվտանգության խորհուրդը հայտարարություն է տարածել, որում նշվում է, որ ՌԴ խաղաղապահների կողմից դիտարկվել է Լաչինի միջանցքում ոչ թե մաքսակետ, այլ ռենտգեն-սկաների տեղադրման հնարավորությունը։ Ի՞նչ վտանգներ եք տեսնում այս գործընթացում։
–Շատ լուրջ վտանգներ եմ տեսնում, որովհետև այդ ռենտգեն-սկաները լինելու են նաև թուրքերի վերահսկողության ներքո։ Ավելի մեծ վտանգ է սակայն այն, որ այստեղի իշխանությունները՝ նույն ԱԱԾ-ն չի հասկանում, որ գործը դրան է գնում։ Սա այն պարզ մեթոդն է, որ այսօր կասեն՝ ռուսական վերահսկողության ներքո է, վաղը կասեն՝ համատեղ վերահսկողության… այս ծրագիրն է։Մեր չինովնիկները միամիտ, երեք տարեկան երեխու նման են իրենց պահում, նույնն էլ ԱԱԾ-ն։ Չէի սպասում, որ նման ձևով կպաշտպանեն այս ծրագիրը, նույնիսկ այդ ռենտգեն-սկաների տեղադրումը։ Այո՛, վտանգավոր է, որովհետև թշնամին իր վերահսկողությունն է մեծացնում Արցախի նկատմամբ՝ ռուսների հետ համագործակցելով։ Սա պայմանավորված գործ է, որի նպատակն Արցախը հայաթափելն է։ Սա այն հարցն է, որից Ադրբեջանը «յան» չի տալու և ամեն ձևով ի կատար է ածելու։
-Իսկ Անվտանգության խորհուրդը սա չի՞ հասկանում, թե՞ շատ լավ էլ հասկանում է։
-Անվտանգության խորհուրդը, այսինքն՝ կոնկրետ Վիտալի Բալասանյանը շատ լավ հասկանում է, հենց ինքն էլ համագործակցում է թշնամու հետ։ Իմ կարծիքով՝ այն նույն քրեական հոդվածները, որ Ադրբեջանն այստեղ բոլորի վրա բացել է, տարածվելու է նաև Վիտոյի վրա։ Հնարավոր է նրան դրել են փակուղու մեջ, որպեսզի իրենց շահերը թելադրեն և որպեսզի Վիտալի Բալասանյանը նրանց թելադրանքները կատարի։ Փաստն այն է, որ նա կատարում է Ադրբեջանի թելադրանքները, այսինքն՝ Ալիևի թելադրանքներն Արցախում առաջնահերթ Բալասանյանն է կյանքի կոչում։
-Արայիկ Հարությունյանն այս գործընթացներում չկա՞։
-Արայիկ Հարությունյանն ամեն տեղ էլ կա, բայց Վիտալիբալասանյանների ազդեցության տակ է, որ այլ ելք չկա, մեզ կջարդեն այսպես կանեն։ Վախ ներշնչելով Ալիևն ամբողջ իշխանությանը պարացնում է իր դուդուկի տակ։ Ընդ որում՝ ոչ միայն իշխանությունը, այլ ընդդիմությունը։ Արցախի Հանրապետության Ազգային ժողովում ինչքան քաղաքական ուժեր կան ներկայացված, բոլորին կամ առել են կամ էլ վախի ազդեցության տակ Ալիևի թելադրանքներն են կատարում։ Փաստերը կարող եմ հատ-հատ բերել։
-Փաստորեն հերթական անգամ ռուս-թուրքական գործարք է տեղի ունենում՝ Արցախի շահերի հաշվին։
-Արցախի իշխանություններն էլ ներգրավված են։ Արցախը հանձնելու են միայն Արցախի իշխանության ձեռքերով, այլ տարբերակ չկա։ Անհնարին է Արցախում հայեր ապրեն ու այն լինի ադրբեջանական։ Բայց մեր իշխանության ձեռքերով այստեղ անտանելի իրավիճակ են ստեղծելու, մարդիկ թողնելու են գնան։ Անցակետի տեղադրումը հենց այդ քայլերից մեկն է։
