Ֆուտբոլի աշխարհի առաջնության փլեյ-օֆֆը մեկնարկեց առանց անակնկալների։ 1/8-րդ եզրափակչի արգելքը առանց լուրջ խոչընդոտների հաղթահարեցին ֆավորիտների շարքում դասվող Նիդեռլանդները, Արգենտինան, Ֆրանսիան և Անգլիան։ Քառորդ եզրափակչում անգլիացիները կմցրեն ֆրանսիացիների, իսկ արգենտինացիները՝ հոլանդացիների հետ։ Ինչևէ, անդրադառնանք երեկ կայացած Ֆրանսիա-Լեհաստան և Անգլիա-Սենեգալ հանդիպումներին։ Ունենալով կադրային լուրջ խնդիրներ Ֆրանսիան ցուցադրեց հերթական դինամիկ և գրավիչ ֆուտբոլը և հաղթեց 3։1 հաշվով։ Քարիմ Բենզեմայի բացակայության պայմաններում թիմի առաջատարի դերը իր վրա է վերցրել 23-ամյա Կիլիան Մբապեն։ Ֆրանսիայի հավաքականի գլխավոր մարզիչ Դիդիե Դեշամը առջևի գծում հենց Մբապեի միջոցով է կառուցում խաղը։ Այո, որոշ դեպքերում երիտասարդ հարձակվողը չարաշահում է անհատական խաղը, բայց մեծ հաշվով այս ֆուտբոլիստին հաջողվում է իր հետևից տանել խաղընկերներին։ Կարճ ասած, Ֆրանսիայի հավաքականում կան բոլոր բաղադրիչները աշխարհի չեմպիոնի կոչումը պահպանելու համար։ Ավելի ստույգ, թիմային խաղից բացի, այս հավաքականի խաղում կա ընդգծված առաջատար։
Նշենք, որ Մբապեն 5 գնդակով գլխավորում է ռմբարկուների ցուցակը, երկու գոլով գերազանցելով Ֆրանսիայի հավաքականի մեկ այլ հարձակվող Օլիվյե Ժիրուին։ Ի դեպ, աշխարհի առաջնություններում Մբապեն արդեն ինը գոլ է խփել և այս ցուցանիշով հավասարվել Արգենտինայի հավաքականի առաջատաև Լիոնել Մեսիին։ Այս արդյունքը Մբապեն գրանցել է աշխարհի առաջնությունում անցկացրած 11 հանդիպումներում, մինչդեռ Մեսին Արգենտինայի կազմում աշխարհի առաջնություններում 23 մրցավեճ է անցկացրել։ «Բարդ հանդիպում էր, քանզի Լեհաստանի հավաքականը համախմբված էր գործում։ Նրանք մեզ խանգարելու ու հաշվի մեջ առաջ անցնելու հնարավորություն ունեին։ Ընդմիջմանը մենք մի փոքր փոխեցինք մեր խաղը։ Կիլիան Մբապեն կարողանում է հարց լուծել, և դա հիանալի է մեր թիմի համար»,- լեհերի դեմ մրցավեճից հետո ասել է Դեշամը։ Ի դեպ, Ֆրանսիա-Լեհաստան հանդիպման ելքը, հաշիվը ինչպես նաև գոլի հեղինակներին գուշակել է Ֆրանսիայի նախագահ Էմանուել Մակրոնը։ «Կարծում եմ՝ Դեշամն ու իր թիմը դուրս կգան հաջորդ փուլ՝ հաղթելով Լեհաստանին 3:1 հաշվով: Լևանդովսկին մեկ գոլ կխփի, ինչպես և Մբապեն։ Կամ գուցե Ժիրուն է, ով ցանկանում է մտնել պատմության մեջ: Եվ ինտրիգ կլինի, թե ով կխփի Ֆրանսիայի հավաքականի երրորդ գոլը»,- խաղից առաջ հայտարարել էր Մակրոնը։ Ընդունենք, որ Ֆրանսիայի նախագահի գուշակությունն ուղղակի ֆանտաստիկ է։
Ինչևէ դեկտեմբերի 10-ին աշխարհի գործող չեմպիոնը կփորձի կոտրել Անգլիայի դիմադրությունը։ Վերջինս երեկ խոշոր 3։0 հաշվով առավելության հասավ Սենեգալի նկատմամբ։ Անգլիացիները կրկին ցուցադրեցին տակտիկական առումով հագեցած ֆուտբոլ։ Ինչպես Ֆրանսիան, այդպես էլ Անգլիան դավանում է թիմային ֆուտբոլ։ Ի տարբերություն ֆրանսիացիների, Անգլիայի թիմում չկա ընդգծված առաջատար։ Ֆրանսիայի նկատմամբ Անգլիան իր հերթին առավելություն ունի ստանդարդ դիրքերի արդյունավետության առումով։
«Մենք ծանր հանդիպում անցկացրինք։ Դե բնական է, աշխարհի առաջնության փլեյ-օֆֆում այլ կերպ չէր կարող լինել։ Ամբողջ մրցաշարի ընթացքում մեր թիմը ցուցադրում է հասուն խաղ։ Հենց սկզբից մենք բնավորություն ցույց տվեցինք և խաղային առումով ճնշեցինք մրցակցին։ Մենք երեք գնդակ խփեցինք, ինչն այսպիսի խաղում շատ կարևոր է։ Երեք խաղում անընդմեջ գոլ բաց չթողնելը նույնպես շատ կարևոր է ։Իմ գոլի դրվագում գնդակը ուղղակի սկուտեղի վրա մատուցվեց ։ Ես հարձակվող եմ եւ միշտ ուրախ եմ գոլ խփել։Հիմա մեր թիմում փորձի և երիտասարդության գերազանց համադրություն կա։ Կվայելենք այս հաղթանակը, հետո կկենտրոնանանք Ֆրանսիայի դեմ խաղի վրա։ Կլինի շատ ծանր ճակատամարտ»,- Սենեգալի դեմ հանդիպումից հետո ասել է Անգլիայի հավաքականի ավագ Հերի Քեյնը։
