Տրանսպորտային միջոցների ներմուծման ոլորտում առկա խնդիրները լուծելու նպատակով՝ գործադիրն ընդունել է համապատասխան որոշում:
Արդյունքում՝ տրանսպորտային միջոցների ներմուծում իրականացնող (ֆիզիկական և իրավաբանական) անձինք կազատվեն ավելորդ վարչարարությունից և անհարկի ֆինանսական կորուստներից: Հիմնավորման համաձայն՝ ներկայումս ՀՀ ներմուծվող տրանսպորտային միջոցների մաքսազերծումը չի իրականացվում ՀՀ սահմանին՝ ներմուծման ժամանակ, այլ դա իրականացվում է ՀՀ սահմանից հեռու, այլ բնակավայրերում (օրինակ՝ Սիսիան, Գյումրի քաղաքներում, իսկ կազմակերպությունների կողմից տ/մ-ի ներմուծման դեպքում՝ Երևան քաղաքում), ինչից հետո նոր միայն տրանսպորտային միջոցը մաքսային ձևակերպում իրականացնող մաքսային մարմնի կողմից ստանում է «Ժամանակավոր» համարանիշ։
Շատ հաճախ ՀՀ ներմուծվող տ/մ-ները սահմանից մինչև մաքսային ձևակերպման վայրեր հասցնելու համար ստիպված են լինում օգտվել ավտոտարհանիչների ծառայությունից, իսկ ներմուծողները ստիպված են լինում ավտոտարհանման համար վճարել բավականին մեծ, հաճախ կամայական և ոչ ողջամիտ գումար, նույնիսկ այն պարագայում, երբ տ/մ-ն սարքին վիճակում է և հնարավորություն ունի վարելու միջոցով հասնել մաքսային ձևակերպման վայր։ Ըստ այդմ՝ առաջարկվում է ՀՀ սահմանին մաքսային մարմիներին լիազորել ՀՀ ներմուծվող և պետական գրանցման ենթակա տ/մ-ներին «Ժամանակավոր» տեսակի համարանիշեր հատկացնելու իրավասությամբ։
Այս առնչությամբ տնտեսագետ Կարեն Սարգսյանը «Առաջին լրատվական»-ի հետ զրույցում դրական գնահատեց այդ փոփոխությունը. «Իրոք դժգոհություններ կան և բազմաթիվ վարչարարական խոչնդոտներ են առաջացնում, և այս որոշմամբ դա վերանում է: Ավտոներկրողները բողոքում էին թե հարկային բեռի, թե ընդհանուր ծախսերի ավելացումից: Իրենք առանց համարանիշի մեքենան պետք է քարշակի վրա դնեին ու տեղափոխեին, իսկ դա թե ժամանակի, թե ֆինանսների լրացուցիչ կորուստ է: Այդ բեռից հիմա նրանք ազատվում են»,-ասաց տնտեսագետը:
Նա նկատեց, որ ավտոներկրողները նաև այլ խնդիրներ են վերհանում, որոնք դեռևս մնում են. «Մասնավորապես, մաքսատուրքերի բարձրացում տեղի ունեցավ, ինչը բարձրացրեց ավտոմեքենաների ներմուծման գները և շուկայում պահանջարկի անկում տեղի ունեցավ, որովհետև փաստացի նույն մեքենան, որը կարելի էր մեկ տարի առաջ գնել, ենթադրենք X գնով, հիմա հնարավոր է գնել ավելի բարձր գնով»:
Կարեն Սարգսյանն անդրադարձավ նաև ՏՏ ոլորտին ուղղված պետական աջակցությանը ծրագրին, որով այդ ոլորտի ընկերություններին հետ է վերադարձվում իրենց վճարած եկամտային հարկի մեծ մասը, նշելով, որ դա բավականին օգտակար էր այդ ընկերությունների համար, թեև բոլոր բարձրացրած խնդիրները չի լուծում. «Մեր ՏՏ ոլորտի ծառայություններն ավելի թանկ են ստացվում, քանի որ դրամն արժևորված է, իսկ դա մրցակցության մեջ խնդիրներ է ստեղծում»:
