Կառավարությունը հաստատեց տեղեկատվական տեխնոլոգիաների ոլորտում գործունեություն իրականացնող առևտրային կազմակերպություններին և անհատ ձեռնարկատերերին պետական աջակցության տրամադրման կարգը։ Պետական աջակցության չափը շուրջ 10 մլրդ դրամ կկազմի։
Բարձր տեխնոլոգիական արդյունաբերության նախարար Ռոբերտ Խաչատրյանը տեղեկացրեց, որ առաջարկվում է պետական աջակցություն տրամադրել ՏՏ ոլորտի այն կազմակերպություններին ու անհատ ձեռնարկատերերին, որոնք 2022թ. հունիսից հոկտեմբեր իրենց աշխատակիցներին վճարվող աշխատավարձային ֆոնդը չեն կրճատել 20%-ից ավելի, ինչպես նաև՝ իրենց կողմից արտերկիր արտահանվող ծառայությունների ծավալը աջակցության տրամադրման ժամանակահատվածում կազմել է իրացման շրջանառության առնվազն 70%-ը։
Այս առնչությամբ, tvyal.com կազմակերպության ղեկավար, ՀՊՏՀ դոցենտ տնտեսագետ Աղասի Թավադյանը «Առաջին լրատվական»-ի հետ զրույցում նախ նշեց, որ ՏՏ ոլորտն ամենաշատ տուժածներից մեկն է, նաև լրջորեն տուժել են թեթև արդյունաբերությունը, հանքարդյունաբերությունը. «Խնդիրներին պետք է համալիր լուծումներ տալ: Իհարկե, սա երկարաժամկետ լուծում չի կարող լինել, սա կարճաժամկետ առումով ստիպում է ՏՏ ոլորտին, որ նրանք վերակառուցվեն և կարողանան աշխատել նոր պայմաններում: Այն փոխարժեքը, որն առկա է շուկայում, այս պահին կայուն է և քիչ հավանական է, որ կտրուկ փոփոխվի։ Կտրուկ փոփոխության համար պետք է տեղի ունենան անսպասելի բաներ»,-ասաց նա:
Հարցին, թե արդյոք այսօր ՏՏ ոլորտը վնասով է աշխատում, ինչպես պնդում են ոլորտի շատ ներկայացուցիչներ, Աղասի Թավադյանը պատասխանեց. «Չի կարելի այդպես ասել, ՏՏ ոլորտի խնդիրները գալիս են նրանից, որ այդ ոլորտում դոլարի առկայությունը մեծ է, իսկ հիմա դոլարի ծավալը շուկայում ավելացել է, քանի որ Ռուսաստանից մեծ թվով քաղաքացիներ են եկել, որոնք զգալի մասը հենց ՏՏ ոլորտից է: Ճիշտ է, արդեն իսկ Հայաստանում ՏՏ ոլորտի կազմակերպությունները տուժել են, բայց քանակապես ավելացել են ՏՏ ոլորտի կազմակերպությունների թիվը, քանի որ ՌԴ-ից մեծ հոսք կա: Եկածներից շատերը ՏՏ կազմակերպություններ են հիմնել Հայաստանում»:
Նա կանխատեսում արեց, որ ՏՏ ոլորտը փոփոխվելու է, որոշները դուրս են գալու դաշտից, մյուսներն ավելի շատ են աշխատելու, և չի կարելի պնդել, որ վատ վիճակում է այս պահին ՏՏ ոլորտը:
Դիտարկմանը՝ արդյոք միայն ՏՏ ոլորտին այսքան աջակցություն տրամադրելը խտրական մոտեցում չէ, այն դեպքում, երբ տնտեսության որոշ ճյուղեր, հատկապես թեթև արդյունաբերությունը նույնպես տուժել է, Թավադյանն ասաց. «Վարվող քաղաքականությունը վկայում է կառավարության առաջնահերթությունների մասին, որովհետև օրինակ, թեթև արդյունաբերությունը մինչև 2018 թվականը կազմում էր մեր ընդհանուր արտահանման 8,5 տոկոսը, հիմա 4 տոկոսից քիչ է: Թեթև արդյունաբերության արտադրանքի արտահանումը դեպի ՌԴ և ԵՄ ընկել է ընդհանուր արտահանման քողի տակ։ Այդուհանդերձ, խնդրին պետք է կոմպլեքս նայել և մյուս ճյուղերին նույնպես աջակցություն տրամադրել»: