«Առաջին լրատվական»-ի զրուցակիցն է ԱՄՆ հայկական համագումարի տարածաշրջանային գրասենյակի տնօրեն Արփի Վարդանյանը։
-Տիկին Վարդանյան, ԵԱՀԿ-ում ԱՄՆ ներկայացուցիչ Մայքլ Քարփենթերը հայտարարել է, որ ԱՄՆ-ն կցանկանա հայ-ադբեջանական սահմանը որքան հնարավոր է շուտ տեսնել սահմանազատված, իսկ խաղաղության պայամանագիրը՝ ստորագրված։ Ձեր կարծիքով՝ ի՞նչ ռեսուրսներ ունի Միացյալ Նահանգները Բաքվին բանակցային դաշտ բերելու համար։
–Որքան էլ Միացյալ Նահանգները ցանկանա, շատ բարդ է պատկերացնել, որ խաղաղության պայմանագիրը մոտ ապագայում կստորագրվի։ Արդեն դեկտեմբերի 1-ն է, նշվում էր, որ այդ պայմանագիրը պետք է ստորագրվի մինչև այս տարվա վերջ, ես դա իրատեսական չեմ համարում։ Ընդհակառակը՝ Ադրբեջանն ամեն ինչ անում է, որ շարունակվի հակամարտությունը, Հայաստանն անընդհատ ռազմական շանտաժի տակ է պահում։
-Եթե ԱՄՆ-ն ունի նման ցանկություն, ապա չի՞ կարող Ադրբեջանին ստիպել լինել ավելի կառուցողական։
-ԱՄՆ-ն միշտ էլ լծակներ ունի և խնդիրը դրանք ուժի մեջ դնելն է։ Եթե կլինի որևէ փոփոխություն՝ շատ լավ, բայց մինչև հիմա ես չեմ տեսել որևէ կոնկրետ գործողություն, որն Ադրբեջանի վրա ազդեցություն է ունեցել։
-Օրինակ պատժամիջոցները կարո՞ղ են զսպիչ գործոն լինել։
-Հնարավոր է։ Բայց մենք հիմա տեսնում ենք, որ կա Էներգետիկ խնդիր, որը հօգուտ Ադրբեջանի է։ ԱՄՆ-ն չի կարող նստել ու մտածել, որ ոչինչ չանելով ինչ-որ բան կփոխվի, բայց արդյոք կգնա ռեալ քայլերի՝ այս փուլում վստահություն հայտնել չեմ կարող։
-Հնարավո՞ր է զսպիչ գործոններից մեկն էլ 907 բանաձի կիրառումը լինի։
-Իհարկե ես, համագումարը միշտ այդ հարցը բարձրացրել ենք։ Ընդհանրապես պետք է նշել, որ կան որոշ պայմաններ, որոնց պետք է Ադրբեջանը հետևի։ Մեր սենատորները փորձում են այնպես անել, որ դա կյանքի կոչվի, նախագահը չշրջանցի։ Պետք է ապացուցվի, որ Ադրբեջանի քաղաքականությունը կործանարար է ու սպառնում է հայության անվտանգությանը։ Միայն այդ դեպքում է հնարավոր հասնել նրան, որ ԱՄՆ նախագահը չշրջանցի։
-Բայց անշուշտ ԱՄՆ-ն ունի Բաքվին կարգավորման դաշտ բերելու ռեսուրսներ, խնդիրը քաղաքական կամքն է պարզապես ։
-Այո՛, իհարկե ունի։ Հուսով եմ, որ այս հարցում մեծ դերակատարություն կունենա նաև նոր դեսպանը, որը շուտով իր աշխատանքը կսկսի Հայաստանում։ Ինքն իր հերթին պետք է ծանոթանա իրավիճակին ու այդ ամենի մասին տեղյակ պահի ԱՄՆ վարչակազմին։ Մի բան է՝ մամուլով ծանոթանաս, այլ բան է, երբ հստակ տեղեկություններ է փոխանցում դեսպանը։
-Կարծում եք՝ դեսպանի աշխատանքից շա՞տ բան է կախված։
-Այո՛, միշտ։ Այդ մասին բազմիցս բարձրաձայնել եմ։