Ֆրանսիայի խորհրդարանի պալատների բանաձևերը, որոնք կոչ են անում պատժամիջոցներ սահմանել Ադրբեջանի նկատմամբ, չեն արտացոլում Փարիզի պաշտոնական դիրքորոշումը։ Այս մասին տեղեկացնում է Ֆրանսիայի ԱԳՆ պաշտոնական կայքը: Ֆրանսիայի խորհրդարանի ստորին պալատը նախօրեին առանց դեմ կամ ձեռնպահ ձայների ընդունել էր Ադրբեջանի ագրեսիան դատախպարտող բանաձև, ըստ էության այն բովանդակությամբ, ինչ պարունակում էր օրեր առաջ Վերին պալատի՝ Սենատի ընդունած բանաձևը: Այստեղ ուշադրության է արժանի այն, որ Ֆրանսիայի ԱԳՆ-ն Սենատի բանաձևի ընդունումից հետո չէր արել այդպիսի պարզաբանում: Ավելին, հրապարակային դաշտում ԱԳՆ-ն լոկ այն արձագանքն էր, որ հնչեցրել էր կառույցի ներկայացուցիչը Սենատում քննարկման ժամանակ, ի պատասխան հարցի, թե՝ կհետևի՞ արդյոք Փարիզը խորհրդարանի հորդորին, ասելով, որ ոչ մի երկիր Հայաստանի համար չի արել ու չի անում ավելին: Նա իհարկե իրավացի է, տվյալ պարագայում սակայն ուշադրության արժանին այն է, թե ինչու՞ Սենատի բանաձևից հետո Ֆրանսիայի ԱԳՆ-ն հարկ չհամարեց ընդգծել, որ դա զուտ խորհրդարանի նախաձեռնություն է, իսկ այժմ՝ ստորին պալատում էլ այդօրինակ բանաձևից հետո արվում է այդպիսի «պարզաբանում», ասելով, որ դա համապատասխանում է իշխանության տարանջատման սկզբունքին:
Գործնականում չկա կասկած, որ խորհրդարանական նախաձեռնություններն ու բանաձևերի ընդունմանը գործադիր իշխանությունը առնվազն չի եղել դեմ և չի դիմադրել: Ավելին, թերևս գործ ունենք իրավիճակի հետ՝ ինչի մասին խոսել եմ բազմիցս, որ բանաձևերը Ֆրանսիայի իշխանության հավաքական քայլն են՝ դիվանագիտական-քաղաքական գործիքակազմի ընդլայնման համատեքստում, հարկ եղած դեպքում այն օգտագործելու համար: Տվյալ պարագայում սակայն պաշտոնական Փարիզի արձագանքը խոսում է այն մասին, որ չկա տեսանելի ապագայում օգտագործելու մտադրություն: Դա նշանակում է, որ բանաձևերը օգնել են արդեն իսկ լուծել որոշակի խնդիրներ, թե՞ հակառակը՝ դրանց ընդունումը առաջացրել է խնդիրներ, առնվազն կարճաժամկետ առումով չի արդարացրել հաշվարկն ու ԱԳՆ արձագանքով Ֆրանսիան փորձում է ներկայումս «բալանսավորել» իրավիճակը:
Ինչպես հայտնի է, Ադրբեջանի նախագահ Ալիևն օրերս հայտարարեց, որ Ֆրանսիան չի կարող լինել Հայաստանի և Ադրբեջանի հակամարտության կարգավորման միջնորդ, պատճառների թվում նշելով նաև Սենատի բանաձևը: Ալիևը նաև հրաժարվում է դեկտեմբերի 7-ին Բրյուսելում Փաշինյանի հետ հանդիպելու պրահյան պայմանավորվածությունից, որը ձեռք էր բերվել քառակողմ ֆորմատով: Ըստ Բաքվի, Երևանը պահանջում է նաև Ֆրանսիայի նախագահի մասնակցություն, իսկ իրենք՝ դեմ են, արդեն նշված պատճառով: Ֆրանսիան կարծես թե առ այսօր չի արձագանքել Բաքվի այդ հայտարարություններին և չի խոսել Պրահա-Բրյուսել պայմանավորվածությունների իրագործման վերաբերյալ: Խորհրդարանի բանաձևին Ֆրանսիայի ԱԳՆ արձագանքն արդյո՞ք Փարիզի դերակատարման հանդեպ Բաքվի դիրքորոշումը փոխելու ուղղությամբ աշխատանքի մաս է, թե՞ Ֆրանսիան առայժմ չի ստացել ակնկալվող արձագանք մյուս խոշոր դերակատարներից և ձգտում է «նվազեցնել արագությունը»: