Երևանի առաջին ատյանի դատավոր Դավիթ Բալայանը մերժել է Վերաքննիչ դատարանի քրեական մասնագիտացմամբ դատավորի թափուր պաշտոնի համար իր թեկնածությունը Հանրապետության նախագահին ներկայացնելու առաջարկը։
Նրա ծառայողական առաջխաղացման կարգով առաջարկվել էր Վերաքննիչ քրեական դատարանի դատավորի պաշտոնը, սակայն Բալայանը այն մերժել է՝ պատճառաբանությամբ, որ եթե ինքն էլ գնա Վերաքննիչ, ապա առաջին ատյանի դատարանի աշխատանքը կխաթարվի, քանի որ 2 դատավոր արդեն գնացել է Վերաքննիչ, իսկ Մնացական Մարտիրոսյանին էլ պատրաստվում են Հակակոռուպցիոն դատարան տեղափոխել, և նրանց վարույթում գտնվող գործերը պետք է բաշխվեն մյուս դատավորների միջև:
Այս առնչությամբ փաստաբան Ալեքսանդր Սիրունյանը «Առաջին լրատվական»-ի հետ զրույցում նշեց. «Մենք շատ ուրախ ենք, որ Դավիթ Բալայանը առաջին ատյանի դատարանից վերաքննիչ չի գնացել: Դա փաստաբանների կարծիքն է: Որովհետև ինքն արդար դատավոր է, իր համար կանոնը օրենքն ու արդարությունն են: Երևի ինքն ավելի շատ է մտահոգված առաջին ատյանի դատարանի աշխատանքով, քան ԲԴԽ-ն»:
Անդրադառնալով դատավորների տեղափոխություններին, և հարցին, թե արդյոք սրանք իշխանության խոստացած բարեփոխումների շրջանակում են, փաստաբանը պատասխանեց. «Ես այս 4,5 տարվա մեջ բարեփոխում չեմ տեսնում: Այս կամ այն դատավորին նկատողություն տալը, կամ 1-2 հոգու գործից հանելը ոչ բարեփոխում է, ոչ էլ՝ վեթինգ: Եթե իրենք ուզում են դրանով հասարակությանը խաբել, իրենք սխալվում են: Հասարակությունը այլ բան է ակնկալում: Մենք բարեփոխում չենք տեսնում, այդ թվում ԲԴԽ-ի այսօրվա կազմը մեզ դուր չի գալիս: Օրենքով սահմանվում է, որ ԲԴԽ-ի կեսը դատավորներ են, մյուս կեսը՝ հարգանքի արժանացած գիտնականներ: Հիմա ես ուզում եմ հասկանամ՝ այդ գիտնականներին ինչ-որ մեկը ճանաչո՞ւմ է: Հիմա ԲԴԽ-ի գիտնական անդամներին, այդ թվում նախագահին, որևէ մեկը հարգո՞ւմ է, ճանաչո՞ւմ է»:
Դիտարկմանը, որ ստացվում է, որ իշխանությունը բարեփոխում իրականացնելու ցանկություն չունի՞, Սիրունյանն արձագանքեց. «Չգիտեմ, վարչապետին հարցրու, թող ինքը պատասխանի, թե 4,5 տարում ինչու դատական համակարգում բարեփոխումները չեն իրականացվում: Դատական կորպուսի առողջ ուժերը, որոնք քիչ չեն, իրենք են ցանկանում, որ այդ մաքրումը, վեթինգը արվի, վերջանա, թեման փակենք, անցնենք առաջ, իրականացնենք արդարադատություն ու պետություն կառուցենք: 4,5 տարվա մեջ ի՞նչ եք արել, ոչ մի բան:
Այս 4,5 տարվա իբր բարեփոխումների արդյունքում Սահմանադրական դատաարանի դատավոր նշանակվեց Արման Դիլանյանը՝ իդեալական մաքուր տղա: Ես իրեն ճանաչում եմ 45 տարի, ուրիշ ի՞նչ եք արել»: