Նոյեմբերի 11-ին ՀՀ ոստիկանության Կոտայքի մարզային վարչությունից բաժին ահազանգ է ստացվել, համաձայն որի՝ Հրազդան համայնքի Սոլակ բնակավայրի վարչական ղեկավար Ռազմիկ Պետրոսյանը, 2021 թվականի դեկտեմբերի 23-ին նշված պաշտոնին նշանակվել է ՏԻՄ մասին ՀՀ օրենքի 31-րդ հոդվածի 8-րդ կետի խախտմամբ:
Օրենքի համաձայն՝ 1000-ից ավելի հաշվառված բնակիչ ունեցող բնակավայրի վարչական ղեկավարը պետք է ունենա բարձրագույն կրթություն: Ձեռնարկված միջոցառումների արդյունքում պարզվել է, որ նա որպես բարձրագույն կրթության դիպլոմ Հրազդանի համայնքապետարան է ներկայացրել Վանաձորի «Սանահին» կառավարման ինստիտուտի կողմից 2006 թվականից տրված «ՄՄ 099009» սերիայի պատվավոր մագիստրոսի կոչում շնորհելու մասին դիպլոմը, որն ընդունվել է Հրազդանի համայնքի աշխատակազմի ղեկավարի կողմից, որպես բարձրագույն կրթության դիպլոմ:
Դրա հիման վրա Հրազդանի համայնքապետի հետ կնքվել է թիվ 04 առ 23.12.2021թ. աշխատանքային պայմանագիրը, սակայն, ձեռք բերված տեղեկությունների համաձայն, Վանաձորի «Սանահին» կառավարման ինստիտուտ ՓԲԸ 2001 թվականի «Լիցենզավորման մասին» ՀՀ օրենքի համաձայն արտոնագրերի ժամկետն ավարտելուց հետո լիցենզավորման գործընթացին չի մասնակցել:
Բացի այդ, պարզվել է, որ Ռազմիկ Պետրոսյանը Հրազդանի համայնքապետարանի կադրերի հաշվառման անձնական թերթիկում նշել է կեղծ կենսագրական տվյալներ առ այն, որ 2001-2006թթ.-ին ուսանել է Վանաձորի վերոհիշյալ ինստիտուտում և ստացել գյուղատնտես-մեխանիկի որակավորում:
Այս առնչությամբ Հրազդան համայնքի Սոլակ բնակավայրի վարչական ղեկավար Ռազմիկ Շաիսմայիլի Պետրոսյանը «Առաջին լրատվական»-ի հետ զրույցում նշեց, որ ինքը կեղծ դիպլոմ չի ներկայացրել, այդ թվականներին հեռակա սովորել է Վանաձորի «Սանահին» կառավարման ինստիտուտ և ստացել գյուղատնտես-մեխանիկի որակավորում. «Դա օրինական դիպլոմ է, ի՞նչ կեղծ դիպլոմ: Ոչ մի կեղծից այստեղ չկա: Հեռակա եմ սովորել, երբ կանչել են՝ գնացել եմ: Ամեն օր չէ, բայց երբ կանչել են՝ գնացել եմ: Այդպիսի բաներ եղել են»,-ասաց նա:
Հարցին, թե որ թվականներին է սովորել, Ռազմիկ Պետրոսյանը հստակ չէր հիշում. «Երևի 2005-ից 2006-ը կամ 2002-ից 2006-ը, տենց չեմ հիշում»:
Ռազմիկ Պետրոսյանը նշեց, որ ահազանգը ոստիկանություն գնացել է իրենց համայնքի մի բնակչի անունից՝, որը հիմա Ֆրանսիայում է ապրում. «Մենք խոսել ենք այդ մարդու հետ, ինքը տեղյակ չի այս պատմությունից, չգիտի՝ ով է գրել իր անունից՝ նման բան: Ոստիկաններն էլ են տեղյակ, որ այդ մարդը տեղյակ չի այդ նամակից: Հիմա թե ով է գրել, ոնց են գրել, պարզ չի: Դեռ ոստիկանները չեն էլ կանչել ինձ, չեն քննել, պետք է կանչեն»,-ասաց նա: