«Առաջին լրատվական»-ի զրուցակիցն է Արցախի խորհրդարանի իշխող «Ազատ հայրենիք-ՔՄԴ» խմբակցության պատգամավոր Արթուր Հարությունյանը։
-Պարոն Հարությունյան, համացանցում ակտիվորեն քննարկվում է Արցախի նախագահի որոշումը, ըստ որի նա շրջանառությունից հանել է սահմանադրական փոփոխությունների նախագիծը։ Ձեր դիտարկմամբ՝ ինչու՞ նման անսպասելի որոշում կայացվեց, երբ բոլոր քաղաքական ուժերը դրան կողմ էին։
–Նախագահ Արայիկ Հարությունյանն արդեն ամեն ինչ պարզաբանել է։ Այդ նախագիծը քաղաքական ուժերը չեն ներկայացրել, կառավարությունն է ներկայացրել ու համապատասխան արձագանք արդեն տրվել է։
-Պարզապես խորհրդարանի բոլոր ուժերը կողմ էին այդ փոփոխություններին, հիմա դեմ չե՞ն, որ նման որոշում կայացվեց։
-Դա Ազգային ժողովով չի ընդունվում, պետք է ընդունվեր հանրաքվեով։ Երկրորդ ընթերցման փուլում, կառավարությունը՝ որպես հեղինակ, հետ է կանչել օրենքի նախագիծը։ Այստեղ որևէ արտառոց բան չկա, սովորական գործընթաց է։
-Պաշտոնական պարզաբանման մեջ նշվում է, որ դա արվում է պառակտվածությունից խուսափելու համար, իսկ կարո՞ղ է հենց այս որոշումը պառակտվածություն առաջացնել։
-Չեմ կարծում։ Հակառակը, անհրաժեշտ է որպեսզի ներքին համերաշխության մթնոլորտը պահպանվի և հենց այդ նպատակով էլ նախագիծը հետ կանչվեց։Կառավարության հետ հարցուպատասխպանի ժամանակ էլ այդ մասին նշվեց։
-Կարծում եք Արցախին առհասարակ պետք չե՞ն սահմանադրական փոփոխություններ։
-Մենք այդ մասին խոսել ենք։ Իհարկե պետք են սահմանադրական փոփոխություններ, մի հոդվածով փոփոխությունը շատ կարևոր էր, որպեսզի ճկունություն ապահովեր սահմանադրության հետագա փոփոխությունների մասով, բայց քանի որ այդպիսի հարց առաջացավ՝ հասարակության մեջ համերաշխությունը չխաթարելու, պառակտում չառաջացնելու հետ կապված, դրա համար էլ կառավարությունը հետ կանչեց։
-Ի՞նչ արրձագանքներ կլինեն, կարծում եք բուռն զարգացումնե՞ր են հնարավոր։
-Չեմ կարծում, որ բուռն քննարկումներ լինեն, որովհետև ամեն դեպքում դա կառավարության իրավասությունն է՝ որպես հեղինակ ներկայացրել են, հետո հետ կանչել։ Այսինքն՝ չեմ կարծում, որ սա պետք է բուռն արձագանքի արժանանա։
-Տպավորություն էր, որ Արցախում բոլոր քաղաքական ու հասարակական ուժերը կողմ են սահմանադրական փոփոխություններին, ի՞նչ հնարավոր պառակտվածության մասին է խոսքը։
–Ես չեմ կարող ասել ինչ մասշտաբի ընդդիմախոսներ են եղել, բայց ամեն դեպքում եղել են տարբեր կարծիքներ, տարբեր դիրքորոշումներ։ Դրա համար էլ հենց այդպիսի որոշում կայացվեց։
-Կառավարության վերջին փոփոխությունները ի՞նչ համատեքստում կարող ենք դիտարկել, գործընթացներն ինչքանո՞վ են իրար հետ կապված։
-Դուք գիտեք, որ Ռուբեն Վարդանյանը նշանակվել է պետնախարար՝ լայն լիազորություններով։ Պետք է կառավարության նոր ծրագիր ներկայացվի։ Այդ փոփոխությունները հենց այդ ծրագրի, դրա հետագա կատարման արդյունքների ապահովման հետ է կապված։
-Այսինքն՝ իր թիմի մարդկանց է բերում։
Իհարկե։ Նոր կառավարություն պետք է ձևավորվի, որպեսզի նոր ծրագրերին ու մարտահրավերներին դիմակայելու հնարավորություն լինի։ Դրա համար էլ կադրային փոփոխություններ են տեղի ունենում։
-Նախագահ Հարությունյանն այս փոփոխություններին չի՞ միջամտում։
–Ամբողջությամբ նախագահի հրամանագրով է կատարվում։ Այսինքն՝ նախագահի հետ համաձայնեցնելով պետնախարարը ձևավորում է նոր կառավարություն։
