Հերթական անգամ պաշտոնական մակարդակով Ռուսաստանը Հայաստանին ասում է, որ իր անվտանգությունը երաշխավորել չի կարող։ Երևանում կայանալիք ՀԱՊԿ նիստի նախօրեին Аргументы и факты-ի հետ զրույցում Ռուսաստանի Դաշնային խորհրդի փոխխոսնակ Կոնստանտին Կոսաչովը հայտարարել է, որ իր կարծիքով՝ Հայաստանի և Ադրբեջանի հակամարտությունը չի մտնում ՀԱՊԿ իրավասության մեջ, անդամ երկրներից յուրաքանչյուրն ինքնուրույն է որոշում իր վերաբերմունքը դրան։
«Ինչ վերաբերում է Ռուսաստանին, հայտնի է, որ մենք անկեղծորեն նպաստում ենք կարգավորմանը։ Ընդ որում, մեր ջանքերը հավասարապես պահանջված են երկու կողմից էլ։ Այլ կերպ չի էլ կարող լինել, իրավիճակը կարող է զարգանալ միայն այսպես։ Այս հակամարտությունում միայն մի կողմին աջակցելու դիրքորոշում որդեգրել, կնշանակի խորացնել այն։ Անհրաժեշտ է որդեգրել խաղաղ կարգավորման դիրքորոշումը և աջակցել, որ այս կարգավորման պայմաններն ընդունելի լինեն բոլոր կողմերի համար»,- հայտարարել է Կոսաչովը։
Արցախցի քաղաքագետ Վահրամ Աթանեսյանն իր գրառմամբ կարծիք է հայտնել, որ միակ ազնիվ խոսքը, որ լսվում է Ռուսաստանից՝ ՀԱՊԿ-ը հայ-ադրբեջանական հակամարտության մեջ կողմ չէ։ Դա, իհարկե, ներքին խողովակներով ասել, հասկացրել են գրեթե քառորդ դար․ «Եվ եթե Հայաստանի իշխանությունը չի իմացել՝ «սովա՞ծ է, թե քու՞նն է տանում»՝ Ռուսաստանի և ՀԱՊԿ-ի մեղքը չէ։ Դառը, բայց շատ օգտակար դաս է։ Որովհետև եթե մեր խնդիրը ՀԱՊԿ-ինը չէ, ապա ՀԱՊԿ-ի խնդիրն էլ մերը չէ»,-գրել է Աթանեսյանը։
ԳԽ պատգամավոր Ազատ Արշակյանի կարծիքով՝ ՌԴ պաշտոնյան շատ ճիշտ գնահատական է տվել․ «Այո՛, Հայաստանի Հանրապետության որևէ հարց դրական իմաստով ՀԱՊԿ-ի գործը չէ, որովհետև ՀԱՊԿ-ը բռնապետությունների ռազմական միություն է, մեզ համար դա թունավոր միջավայր է։ ՀԱՊԿ-ը կարող է զբաղվել բռնապետերի անձնական շահերը պաշտպանող գործունեությամբ։ Հայաստանն ի՞նչ կապ ունի ՀԱՊԿ-ի հետ, Հայաստանի Հանրապետությունը բռնակցված է բռնապետերի միությանը՝ այդ թվում ՀԱՊԿ-ի միջոցով»,-«Առաջին լրատվական»-ի հետ զրույցում ասաց նա։
Արշակյանի խոսքերով՝ Հայաստանը պետք է հետաքրքրվի միայն այդ կազմակերպության հուղարկավորութամբ․ «Մենք միայն այդ կազմակերպության թաղումը պետք է կազմակերպենք։ Շատ լավ կլինի, որ մենք մասնակցենք այդ արարողությանը։ Եթե մենք մասնակից լինենք ոչնչացմանը, ապա կարող ենք որպես թաղումներ լավ կազմակերպող էթնոս ՝ մասնակցել։ Իսկ Կոսաչովի ասածը անկեղծություն չէ, սպառնալիք է, իրականում մեզ սպառնում են՝ ասում են իմացե՛ք, որ ձեր կողքին չենք։ Եթե մենք ձեր կողքին չենք, ուրեմն ձեր դեմ ենք, դուք մերը չեք։
Ամենամեղմը՝ դուք ընդամենը մեր գերին եք»,-եզրափակեց նա։
Քաղաքագետ Ռուբեն Մեհրաբյանն էլ գտնում է, որ պետք է արժանին մատուցել պարոն Կոսաչովին իր ազնվության համար․ «Ըստ էության իր հայտարարությամբ ակնհայտ է դառնում, որ ՀԱՊԿ-ը անիմաստ, անպետք, անգործունակ, աննպատակ կազմակերպություն է»,-«Առաջին լրատվական»-ի հետ զրույցում ասաց նա։
Ըստ Մեհրաբյանի՝ միակ բանը, որ մեզ մնում է անել՝ միանգամայն համաձայնություն հայտնել պարոն Կոսաչովի այդ գնահատականին․ «Ու դրանից բխեցնել մեր հետագա անելիքները։ Այսպես կոչված գագաթնաժողովից հետո Հայաստանը պետք է գործընթաց սկսի ոչ միայն ՀԱՊԿ-ից դուրս գալու հետ կապված, այլ անհրաժեշտ է նաև Հայաստան-Ռուսաստան հարաբերությունների ռազմավարական վերանայման խորքային գործընթաց սկսել։
Իսկ այս բազմափուլ գործընթացի առաջին քայլը ՀԱՊԿ-ից դուրս գալը պետք է լինի»,-եզրափակեց նա։
