Ֆրանսիան մերժել է Հայաստանին արտահանձնել Սյունիքի նախկին մարզպետ Սուրիկ Խաչատրյանին։ Ազատության փոխանցմամբ, Գլխավոր դատախազությունը մերժումը ստացել է մոտ մեկ ամիս առաջ։
Ֆրանսիայի Եվրոպայի և արտաքին գործերի նախարարությունը Հայաստանի արտաքին գերատեսչության միջոցով պատասխանել է, որ դեռ հինգ ամիս առաջ դատական մարմինները բացասական կարծիք են հայտնել Խաչատրյանին արտահանձնելու դիմումի վերաբերյալ։ Այս որոշման հիմքում դրվել է Արտահանձնման Եվրոպական կոնվենցիան, ըստ որի, «Խաչատրյանի արտահանձնումը նրա համար կարող է ունենալ բացառիկ ծանր հետևանքներ»։
Թե ի՞նչ ծանր հետևանքների մասին է վկայակոչված ֆրանսիական դատական մարմինների եզրակացության մեջ, Հայաստանի դատախազությունը չի մանրամասնում։
Ռադարը հիշեցրել է, թե ում չեն արտահանձնել Հայաստանին։ Դեռ 2020-ից հետախուզվող գործարար Սամվել Մայրապետյանի դեպքում հարցը Գերմանիայի դատական իշխանություններին չի հասել. նրա նկատմամբ հետախուզմանը Գերմանիայի Ինտերպոլի ազգային բյուրոն ընթացք չի տվել։
ռուսաստանը հրաժարվել է արտահանձնել պաշտպանության նախկին նախարար Միքայել Հարությունյանին, նախկին գլխավոր դատախազ Գևորգ Կոստանյանին, մարտի 1-ի գործով քննչական խմբի նախկին ղեկավար Վահագն Հարությունյանին, Սերժ Սարգսյանի փեսա Միքայել Մինասյանին, ԴԱՀԿ նախկին պետ Միհրան Պողոսյանին, նախկին պատգամավոր Ռուբեն Հայրապետյանին։
Այս ընթացքում արտահանձնվել է երկու հոգի՝ նախկին պատգամավոր Լևոն Սարգսյանը՝ Ալրաղացի Լյովիկը, և Սերժ Սարգսյանի եղբորորդին՝ Նարեկ Սարգսյանը։ Ալրաղացի Լյովիկին արտահանձնել են ռուս իրավապահները, «Ֆրանկլին Գոնսալես» անունով ծպտված Նարեկ Սարգսյանին՝ Չեխիայի իրավապահները։