Օրերս ադրբեջանական լրատվամիջոցները հերթական ապատեղեկատվությունն էին տարածել, ըստ որի՝ Հարավային Կորեայում անցկացվող «Պատմական քաղաքների լիգայի» համաշխարհային համաժողովի շրջանակներում Բաքուն համագործակցության քառակողմ հուշագիր է ստորագրել, որի շրջանակներում պերուական Կուսկո, կորեական Անդոնգի, հունական Կորնթոս պատմական քաղաքները կհամագործակցեն Շուշի քաղաքի հետ և իբր այն ստորագրել է Շուշիի շրջանում Ադրբեջանի նախագահի հատուկ ներկայացուցիչ Այդին Քերիմովը։
Հայաստանում Հունաստանի դեսպան Տիգրան Մկրտչյանը վկայակոչել է Կորնթոսի քաղաքապետին և հայտարարել, որ հունական Կորնթոս քաղաքը Շուշիի հետ համագործակցության հուշագիր չի ստորագրել. «Ես միանշանակ ձեզ հավաստիացնում եմ, որ չեմ պատրաստվում ստորագրել, կամ անգամ Կորնթոսի քաղաքային խորհրդում քննարկման դնել Շուշի քաղաքի հետ համագործակցության պայմանագիրը: Ես չեղարկում եմ Շուշի քաղաքի հետ համագործակցության պայմանագրի մտադրության մասին ստորագրությունը», – ասել է քաղաքապետը։
Շուշիի քաղաքապետ Արծվիկ Սարգսյանը «Առաջին լրատվական»-ի հետ զրույցում, անդրադառնալով Շուշիի՝ մինչ պատերազմն աշխարհի տարբեր քաղաքաների հետ կնքած համաձայնագրերին, նշեց, որ դրանք բազմաթիվ են եղել. «Շուշին այլ քաղաքների հետ քույր քաղաք լինելու համաձայնագրեր ունի. Ֆրանսիայի Բուրգ դե Վալանս, Սենտ էտիեն, Լիլոռվա, Լոս Անջելես։ Շատ դեպքերում մենք չենք գնացել , իրենք են եկել, Շուշիում հանդիպել, հռչակագիր ստորագրել: Լոս Անջելեսի դեպքում էլ իրենց քաղաքային խորհուրդն է ստորագրել։ Հետո եկան Շուշի, հանձնեցին համաձայնագիրը»,-ասաց նա:
Կորնթոսի քաղաքապետի հայտարարությունն էլ, ըստ Սարգսյանի, վկայում է, որ նրանք Շուշին հիմա չեն ճանաչում:
«Բուրգ դե Վալանսի քաղաքապետը պատերազմի օրերին լիքը օգնություն է հավաքել, ուղարկել։ Ճիշտն ասած, Ալիևը մի քիչ շատ է վեր-վեր թռնում, մանավանդ Շուշիի հետ կապված, Թուրքիայի հետ հռչակագիր են ստորագրել, մեզ համար ցավալի է, բայց իրենց ձեռքն է: Նոյեմբերի 9-ին տոնակատարություններ են արել, հրավառություն, բնական է, մենք էլ 30 տարի նույնն ենք արել։
Շուշին օկուպացված է, Հադրութը, Մարտունին էլ, Մարտակերտը հռչակագրեր ունեին ստորագրած Ֆրանսիայի հետ։
Շուշեցիներից 900 բնակիչ տեղափոխվել է Հայաստան, մյուսները կողքից զոհվածների, բազմազավակ ընտանիքներ բնակարան են ստանում, երկրորդային շուկայից տուն են ձեռք բերում։ Մինչև 2024 թվականը պետք է կարողանան բոլորին ապահովել։
