Մ․ Նալբանդյանի անվան Շիրակի պետական համալսարանը «Մասնագիտական կրթության որակի ապահովման ազգային կենտրոնի» հավատարմագրման հանձնաժողովի կողմից հավատարմագրվել է երկու տարի ժամկետով, քանի որ ինստիտուցիոնալ հավատարմագրման 10 չափանիշներից 3-ը՝ Կառավարում և վարչարարություն, Մասնագիտության կրթական ծրագրեր և Հետազոտություն և զարգացում, գնահատվել են անբավարար։
Նախօրեին Շիրակի պետական համալսարանի հոգաբարձուների խորհրդի նիստի ժամանակ խորհրդի նախագահ Լևոն Բարսեղյանը հայտարարեց, թե բուհի զարգացման համար ռիսկեր է տեսնում։ Բուհի ռեկտոր Երվանդ Սերոբյանը ընդունեց, որ ի պաշտոնե ինքն է պատասխանատու սրա համար, սակայն հավելեց, որ, ամենակարևորը, կարողացել են աշխատանքային մթնոլորտ ձևավորել։
Շիրակի պետական համալսարանի Հոգաբարձուների խորհրդի նախագահ Լևոն Բարսեղյանը «Առաջին լրատվական»-ի հետ զրույցում նշեց մանրմասներ․
«Շաբաթ օրը մենք ունեցել ենք Հոգաբարձուների խորհրդի նիստ, որի ժամանակ օրակարգի հարցերից մեկով խնդրել էինք, որ ռեկտորը ներկայացնի տեղի ունեցածը: Ներկայացրեց պարոն Սերոբյանը: Իմ գնահատմամբ, ցավոք, դասեր չեն քաղվել նախկին գնահատման ժամանակ արձանագրված թերություններից, շեշտադրված խնդիրներից: Մի ամբողջ շարք խնդիրներ կան բացահայտված»,-ասաց նա:
Անդրադառնալով 10 չափանիշներից երեքի՝ անբավարար գնահատվելուն՝ Բարսեղյանը նշեց, որ նախորդ անգամ էլ սրանք անբավարար են գնահատվել, ինչը, ըստ նրա, նշանակում է, որ, ցավոք, համալսարանի գործադիր կառավարումը դասեր չի քաղել:
«Այս մասին խոսվել է շաբաթ օրը կայացած Հոգաբարձուների խորհրդի նիստում, հնչել է քննադատություն, զարմանք, հիասթափություն: Ռիսկերի մասին է խոսվել, որ մարդը համալսարան դիմելիս պետք է մտածի՝ դիմի, թե չդիմի, քանի որ հավատարմագրումը երկու տարով է: Պատճառ բերվեց կովիդը, պատերազմը, ներքին խնդիրները, բայց դրանք հարգելի պատճառներ չեն, որովհետև համալարանը գործել է, կառավարվել է ըստ սովորական ռեժիմի: Ճիշտ է, մեկ տարի hոգաբարձուների խորհուրդ չի եղել: Զեկույցում կան ցուցումներ, թե ինչ պետք է անել: Հոգաբարձուների խորհրդի նիստի ժամանակ հոգաբարձուները ստացան հավաստիացումներ, որ այս բոլոր դիտողությունները պատշաճ կերպով սպասարկվելու են, իրականացվելու են: Օրինակ`hամալսարանի առաքելությունների, նպատակների, խնդիրների, կարիքների գնահատման գործընթացներում ներքին ու արտաքին շահակիրների մասնակցությունը պետք է ակտիվացվի: Իրականացվող գործընթացների արդյունավետությունը հստակ որակական ու քանակական ցուցիչներ պետք է ունենա, վեր հանված խնդիրներին լուծումներ տա: Հավատարմագրման հանձնաժողովի որոշման մեջ ասվում է, որ երկու ամսում պետք է ներկայացնել փորձագիտական զեկույցում նշված թերությունների վերացման, վերանայման ծրագիր, համապատասխան ժամանակացույց, նշված երեք ոլորտներում առկա խնդիրներին առաջնահերթ լուծումներ տալու անհրաժեշտությունը հաշվի առնելով»,-ասաց նա: Հոգաբարձուների խորհրդի նախագահի խոսքով՝ 6 ամիսը մեկ համալսարանը Կենտրոնին պետք է գրավոր զեկույց ներկայացնի իրականացված գործողությունների արդյունքների վերաբերյալ, այսինքն՝ որակի կենտրոնը ոչ թե գնահատում ու քաշվում է մի կողմ, այլ կոնկրետ ցուցումներ է տալիս և հետևողականորեն հսկելու է․ հոգաբարձուների խորհրդի պարտականությունն է հետևել, որ այս ամբողջը պատշաճ կատարվի:
Լևոն Բարսեղյանի խոսքով՝ վերջին տարիներին հոգաբարձուների խորհուրդը հետևողականորեն բոլոր նիստերին առաջարկել է, պնդել է, որ այս բոլոր խնդիրները բարեխղճորեն լուծել, որ հավատարմագրման խնդիր չլինի։ Բարսեղյանի խոսքով՝ վատ կառավարման և վարչարարության հետ գործ ունենք։
Ինչ վերաբերում է ռեկտորի հավաստիացումներին, թե բուհում մթնոլորտ է փոխվել, Բարսեղյանը նշեց, որ ինչ-որ չափով փոխվել է, բայց այս պահին բուհի դեմ հինգ դատական գործ կա բուհի նախկին աշխատակիցների կողմից։ Նա նաև նշեց, որ ինքը կողմնակից է բուհի կառավարման բաց համակարգին․
«Այս խնդիրների արմատները շատ խորն են։ Խորհրդային տարիներից գալիս է այս ադաթավոր, տնավարի, ուղղաձիգ կառավարումը։ Ոչ թե նախարարը կամ ռեկտորը գործ ունենա 300 հետ, այլ այն բաշխվի ամբողջ ապարատի վրա։ Այսինքն՝ կառավարման, գիտելիքների շնորհիվ կարելի է հասնել ավելի որակյալ կառավարման։ Առայժմ համբերությունս չի հատել։ Իրականում իրավիճակը տխուր է, և այն պետք է պատշաճ լուսաբանվի»,-հավելեց Բարսեղյանը։
