Грузия Online-ի փոխանցմամբ՝ Վրաստանի նախկին նախագահ Էդուարդ Շևարդնաձեն հանդես է եկել ռուսերեն լեզվի պաշտպանությամբ.
«Վրացական ներկայիս իշխանությունների և անձամբ նախագահ Միխեիլ Սաակաշվիլիի այն փորձերը, որոնք ուղղված են Վրաստանում ռուսերեն լեզվի արգելքին ու սահմանափակմանը, այլատյացության դրսևորումներ են։
Դա վերաբերում է նրանց ելույթներում հնչող այն վիրավորական հայտարարություններին, որոնք առնչվում են ռուս ժողովրդին, ռուսերեն լեզվով ֆիլմերի ցուցադրման արգելքին, Մոսկվա այցելող բոլոր անձանց «դավաճան» պիտակելուն և այլն։
Դժբախտաբար, մենք դրա համար պատիժ ենք կրելու, սակայն այդ պատիժը չի սահմանափակվի միայն մեկ մարդով, պատժվելու է ողջ երկիրը»։
Շևարդնաձեն նաև ընդգծել է, որ երկրում տիրում է ոչ ճիշտ պետական կարգ, որը բարիք և զարգացում չի բերում։ Նա հիշեցրել է, որ 1990 թվականին հրաժարական է տվել ԽՍՀՄ արտգործնախարարի պաշտոնից, քանի որ համոզված էր, որ երկրում տիրում է սխալ պետական կարգ։
Հիշեցնենք, որ օգոստոսի կեսերին էլ Շևարդնաձեն վրացական «Ասավալ-դասավալի» թերթին տված հարցազրույցում հայտարարել էր, թե Վրաստանը զգում է Ռուսաստանի կարիքը. «Կեղծիք է, թե, ինչպես Վրաստանում են ասում, Ռուսաստանը նրա համար ոչինչ չի նշանակում։ Ռուսաստանը մշտապես եղել է, կա և կլինի Վրաստանի կարևորագույն հարևանը։
Վրաստանի կարևորագույն խնդիրների, այդ թվում նաև Աբխազիայի ու Հարավային Օսիայի լուծման բանալիները գտնվում են հենց Մոսկվայում։
Այնուամենայնիվ, մոտակա 2-3 տարիներին երկու երկրների փոխհարաբերությունները չեն բարելավվի»։
