«Էրեբունի» պատմահնագիտական արգելոց-թանգարանի տնօրեն Միքայել Բադալյանը ներկայացնում է այս տարի իրականացված պեղումները էրեբունի արգելոց-թանգարանից դուրս գտնվող արտաքին բնակավայրում:
«Այս հատվածում մենք ունենք և ուշ ուրարտական և դրանից հետո Երվանդունիների ժամանակաշրջանին վերաբերող փուլ: Այստեղ է Էրեբունի ամրոցը: Ամրոցները Ուրարտուում շատ-շատ են պեղված, բայց եթե մենք ուզում ենք Ուրարտուն հասկանանք, պետք է պեղենք ոչ միայն ամրոցը, այլ ամրոցից դուրս գտնվող արտաքին բնակավայրը: Եթե մենք մի 2 հազար տարի հետո Հայաստանը պեղենք ու ինչ-որ մի մեծահարուստի շքեղ առանձնատուն կամ դղյակ հայտնաբերենք, դա Հայաստանը չի լինի: Հայաստանը այդ դղյակից դուրս կող հասարակ մարդկանց թաղամասն է»,-ասում է Միքայել Բադալյանը:
Նա նաև նշում է, որ ժամանակին Ֆրանսիայի դեսպանատան աջակցությամբ Լիդար սկաներով արվեց հատուկ ուսումնասիրություն: Նրա խոսքով՝ Լիդար սկաները վերացնում է ամբողջ բուսականությունը, և եթե ուշադիր նայեք, այստեղ մենք ունենք կառույցների հետքեր և հենց այս հատվածում ենք պեղումներ իրականացնում:
Բադալյանի խոսքով՝ վերջին տարիներին բավական աճել է հնագիտության նկատմամբ պահանջարկը.«Մենք պետք է փոխենք հնագետի, թանգարանագետի, ընդհանրապես, տարբեր նման մասնագետների մասին մեր պատկերացումը: Ես հիշում եմ, որ երբ մեկը ջութակի էր գնում, դա շատ վատ երևույթ էր, սովորելը շատ վատ երևույթ էր, որովհետև շատերը գիտեին, որ ատեստատ են առնելու կամ ինստիտուտի դիպլոմ են առնելու և նմանվելու են թանկ ավտոներով սիգնալ տվող մարդկանց»: