Իտալական խոհանոցի շաբաթվա շրջանակներում Հայաստան֊ում Իտալիայի Հանրապետության դեսպան Ալֆոնսո Դի Ռիզոն, Չիլենտոյի Բարձրագույն կրթական ինստիտուտի խոհարարական արվեստի գծով պրոֆեսոր Միկելե Ջակուինդոն և նույն ինստիտուտի ուսանողուհի Սամանտա Ռադանոն նոյեմբերի 17-ին այցելել են Վալերի Բրյուսովի անվան պետական համալսարան։ Ինչպես տեղեկացրին համալսարանից, ռեկտոր Կարինե Հարությունյանի և իտալերենի դասախոսների ուղեկցությամբ՝ հյուրերը համտեսել են բուհի ուսանողների պատրաստած ճաշատեսակներն ու քաղցրավենիքը։
«Խոհանոցը երկրի մշակույթի անբաժան մասն է։ Մեր համալսարանի նպատակը ոչ միայն լեզուների ուսուցումն է, այլև՝ այլ մշակույթների հետ փոխհարաբերվելուն, ինչպես նաև՝ միջմշակութային հաղորդակցման զարգացմանը նպաստելը։ Միջոցառմամբ հետաքրքրված ուսանողներն իտալական խոհանոցի հայտնի ուտեստներից են պատրաստել, որոնք շատ սիրված են և մեծ ժողովրդականություն են վայելում շատերի մոտ», – ողջունելով միջոցառման մասնակիցներին՝ նշել է համալսարանի ռեկտոր Կարինե Հարությունյանը՝ առանձնահատուկ կարևորելով երկու ժողովուրդների կապերի զարգացման համատեքստում նման միջոցառումների անցկացումը։
Ըստ աղբյուրի՝ Հայաստան֊ում Իտալիայի Հանրապետության դեսպան Ալֆոնսո Դի Ռիզոն այս ուսումնական տարում արդեն երրորդ անգամ է այցելում Բրյուսովի անվան պետական համալսարան: Նրա խոսքով՝ Հայաստանում իտալական խոհանոցի հանդեպ հետաքրքրությունն աճել է։ Դեսպանն ասում է՝ խոհարարները նաև կամուրջ են ստեղծում տարբեր երկրների խոհանոցային մշակույթների միջև՝ իրենց պատրաստած ուտեստների շնորհիվ:
Հատուկ միջոցառմանը մասնակցելու համար՝ դեսպանն ընտրել էր հայտնի իտալական խոհարարների, որոնցից մեկը ներկայացրել է իր իսկ հեղինակային ուտեստը:
Նշվում է, որ յոթ տարի մասնակցելով խոհարարական միջոցառումների և լինելով յոթ երկրներում’ միայն Հայաստանում է Միկելե Ջակուինդոն տեսել իտակական խոհանոցին այսչափ նման ուտեստներ: Նա առանձնահատուկ ընդգծել է հայ և իտալացի ժողովուրդների նմանություններն ու գոհունակությամբ փաստել, որ մեր երկրում իտալական խոհանոցի նկատմամբ մեծ հետաքրքրություն կա, և Բրյուսովի անվան համալսրանը կարևոր դեր է խաղում իտալական մշակույթի տարածման գործում։
