Տեղեկություն է տարածվել, որ Վարչապետ Նիկոլ Փաշինյանը հյուրընկալել է Շվեյցարիայի Համադաշնության նախկին նախագահ Միշելին Կալմի-Ռեհյին, ով երեկ էլ հանդիպել էր անվտանգության խորհրդի քարտուղար Արմեն Գրիգորյանի հետ: Հանդիպմանը քննարկվել են ռեգիոնալ և միջազգային օրակարգին առնչվող հարցեր, հայ-ադրբեջանական հակամարտությանն առնչվող իրողություններ, այդ թվում Ադրբեջանի ագրեսիան Հայաստանի ինքնիշխան տարածքի նկատմամբ: Արժե արձանագրել, որ Հայաստանի վարչապետի և ԱԽ քարտուղարի հյուրը և տեղի ունեցած հանդիպումը բավականին հետաքրքիր են:
Եվ պատճառը լոկ այն չէ, որ տիկին Կալմի-Ռեհյը Շվեյցարայի նախկին նախագահն է: Այդ երկրում նախագահի պաշտոնը ստանձնում են որոշակի ռոտացիոն առանձնահատուկ կարգով: Միշելին Կալմի-Ռեհյը Շվեյցարիայի նախագահի պաշտոնը զբաղեցրել է 2007 թվականի հունվարի 1-ից դեկտեմբերի 3, և 2011 թվականի հունվարի 1-ից դեկտեմբերի 31: Առավել հետաքրքիր է այն, որ Կալմի-Ռեհյը եղել է Շվեյցարիայի արտաքին գործերի երկարամյա նախարար՝ 2003 թվականից մինչև 2011 թվական: Նկատենք, որ դա մի շրջափուլ էր, երբ ծավալվեց նաև հայ-թուրքական ֆուտբոլային դիվանագիտությունը և Շվեյցարիան այդ գործընթացում իրականացնում էր միջնորդական առաքելություն: Ընդ որում, Շվեյցարիան որոշակի դերակատարում ուներ ոչ միայն այդ գործընթացում, այլ նաև դրանից առաջ եղած հայ-թուրքական կարգավորման ուղղությամբ տարաֆորմատ շփումներում:
Այլ կերպ ասած, Հայաստանի վարչապետի ու անվտանգության խորհրդի քարտուղարի հետ հանդիպում է Շվեյցարիայի նախկին մի պաշտոնյա, որն ունեցել է Հայաստանին առնչվող կարևոր ժամանակաշրջանի կարևոր դերակատարում, ինչը թույլ է տալիս նվազագույնը ուրվագծել նախկին պաշտոնյայի Հայաստան այցի որոշակի մոտիվներ, նաև արձանագրել, որ ներկայումս տեղի ունեցող զարգացումները, քննարկումները այդուհանդերձ էական կապակցվածություն ունեն նախորդ ժամանակաշրջաններում եղած գործընթացների հետ:
Ի դեպ, Շվեյցարիայի նախկին նախագահի և արտգործնախարարի պարագայում հիշարժան է նաև այն, որ Կալմի-Ռեհյը գործունեության հետագծում առավել աղմկոտ դրվագներից է եղել նրա 2008 թվականի այցը Իրան, որտեղ նա պայմանագիր էր ստորագրել Շվեյցարիա իրանական գազի մատակարարման վերաբերյալ, ինչը բողոք էր առաջացրել Շվեյցարիայի ազատական շրջանակներում: Թերևս ուշադրության արժանի հանգամանք է և այն, որ 2014 թվականին նա պարգևատրվել է Ռուսաստանի Բարեկամության շքանշանով՝ ռուս-շվեյցարական հարաբերությունում ներդրման համար:
Իսկ մինչ այդ՝ 2012 թվականին, Միշելին Կալմի-Ռեհյին Հայաստանը պարգևատրել է Պատվո շքանշանով՝ հայ-շվեյցարական հարաբերության զարգացման ու ամրապնդման գործում մեծ ավանդի համար:
