Վրաստանը պատրաստ է խթանել Հայաստանի և Ադրբեջանի երկխոսությունը, Թբիլիսիում ընդունելով Ադրբեջանի պաշտպանության նախարար Հասանովին հայտարարել է Վրաստանի վարչապետ Ղարիբաշվիլին: Հասանովի այցը հաջորդում է շաբաթներ առաջ Իլհամ Ալիևի Թբիլիսի կատարած «անսպասելի»՝ չազդարարված այցին, որի ընթացքում, ըստ դիվանագիտական աղբյուրների, Ադրբեջանի նախագահը փորձել էր Վրաստանից ստանալ հավաստիացում, որ ռեգիոնալ հնարավոր լարվածության դեպքում Թբիլիսին կաջակցի, կամ կգործի Ադրբեջանին աջակցության տրամաբանության շրջանակում: Սակայն, դարձյալ ըստ դիվանագիտական աղբյուրների, Ալիևը չի ստացել ցանկալի հավաստիացում: Ըստ ամենայնի, Հասանովի վրացական այցը վկայում է, որ Բաքուն չի հրաժարվում փորձերից և դրա անուղղակի ցուցիչ է նաև այն, որ Վրաստանի վարչապետը Ադրբեջանի պաշտպանության նախարարին վերստին հայտնում է, որ Թբիլիսին դիրքավորվում է հարավկովկասյան երկխոսության, ըստ այդմ Հայաստանի ու Ադրբեջանի միջև «ընտրություն» չկատարելու տրամաբանության շրջանակում: Վրաստանի այդ դիրքորոշումը ռեգիոնալ անվտանգության և կայունության կառվարելիության համար անշուշտ ունի էական նշանակություն, հաշվի առնելով թերևս նաև այն, որ արտացոլում է ոչ միայն զուտ վրացական հետաքրքրությունների ու շահերի շրջանակ: Այդ իմաստով Վրաստանի վարրչապետի խոսքն առավել ուշագրավ է դառնում այն ֆոնին, որ հնչում է նրա Շարմ էլ Շեյխ կատարած այցից հետո, որտեղ Իրակլի Ղարիբաշվիլին մասնակցեց Կլիմայի հարցերի ՄԱԿ Վեհաժողովին:
Բանն այն է, որ Վեհաժողովի շրջանակում Եգիպտոսի այդ քաղաքում էին հավաքվել բազմաթիվ առաջնորդներ, ընդհուպ ԱՄՆ նախագահ Բայդենը: Միևնույն ժամանակ, գործնականում դրան զուգահեռ Վրաստանի նախագահ Սոլոմե Զուրաբիշվիլին Եվրոպակում մասնակցեց Ֆրանսիայի նախագահի գլխավորությամբ անցկացված Փարիզի խաղաղության համաժողովին: Այդպիսով, Հայաստանի և Ադրբեջանի միջև ոչ թե «ընտրություն» կատարելու, այլ երկխոսությանը նպաստելու հաստատակամության մասին Իրակլի Ղարիբաշվիլիի հավաստիացումը կարևոր է հնչում հենց Թբիլիսիի արտաքին քաղաքական-դիվանագիտական այցերի ֆոնին: Այդ ամենի հանրագումարում էլ արժե նկատել, որ նոյեմբերի 14-ին Թբիլիսիում տեղի է ունեցել հայ-վրացական քաղաքական խորհրդակցություններ՝ արտաքին գործերի փոխնախարարների մակարդակով: Թբիլիսիի կարևոր հավասարակշռությունն անշուշտ Երևանից պահանջում է շարունակվող աշխատանք:
