Ֆուտբոլի Հայաստանի ազգային հավաքականը վաղը Պրիշտինայում ընկերական խաղում կմրցի Կոսովոյի ընտրանու հետ։ Մեր հավաքականն առաջին մրցավեճը կանցկացնի Ռոման Բերեզովսկու գլխավորությամբ։ Հիշեցնենք, որ Խոակին Կապառոսի հեռանալուց հետո ՀՖՖ-ն լեգենդար դարպասապահին նշանակեց մեր ազգային թիմի գլխավոր մարզչի պաշտոնակատար։ Ի՞նչ խնդիր պետք է լուծի Բերեզովսկին առաջիկա ընկերական հանդիպումներում և ընդհանրապես ի՞նչ կտան դրանք մեր հավաքականին։ Չմոռանանք, որ նոյեմբերի 19-ին էլ Հայաստանի ընտրանին հյուրընկլավելու է Ալբանիային։ Նախապատրաստական հավաքին Բերեզովսկին չէր հրավիրել մի շարք առաջատար ֆուտբոլիստների։ Մասնավորապես, հավաքականին չեն միացել Էդուարդ Սպերցյանը, Հովհաննես Համբարձումյանը, Անդրե Չալըշըրը, Խորեն Բայրամյանը, Լուկաս Սելարայանը, Սարգիս Ադամյանը, Տիգրան Բարսեղյանը։ Վերջինս «Սլովանի» մարզման ժամանակ վնասվածք էր ստացել և ապաքինման փուլում է։ Կարճ ասած առաջիկա երկու մրցավեճերին Հայաստանի հավաքականը կխաղա երկրորդ կազմով։ Սա ամենևին չի նշանակում, որ վաղվա խաղում արդյունքը կարևոր չէ մեզ համար։ Անկախ խաղի բնույթից թիմի գլխավոր նպատակը պետք է լինի հաղթելը։ Բերեզովսկին վաղը հնարավորություն կտա այն ֆուտբոլիստներին, որոնք պայքարում են ազգային թիմում տեղ ունենալու համար։ Այսինքն մոտիվացիայի խնդիր Կոսովոյի դեմ մեր ֆուտբոլիստները չեն ունենա։
Փորձենք հասկանալ ինչ է իրենից ներկայացնում Կոսվոյի հավաքականը և ինչպիսին են մեր հնարավորությունները։ ՖԻՖԱ-ի դասակարգման աղյուսակում Կոսովոն այս պահին 107-րդն է, մինչդեռ մեր ազգային հավաքականը գտնվում է 93-րդ հորիզոնականում։ Հայաստանի դեմ խաղին Կոսվոյի 70-ամյա ֆրանսիացի մարզիչ Ալեն Ժիրեսը հրավիրել է 22 ֆուտբոլիստների որոնց տրանսֆերային ընդհանուր արժեքը կազմում է 9․8 միլիոն եվրո է։ Կոսովոյի հավաքականի ճամբարում գտնվող ֆուբոլիստներից 17-ը լեգեոներներ են։ Այս պահին Կոսովոյում չկա գեթ մեկ ֆուտբոլիստ, որի տրանսֆերային արժեքը գերազանցի մեկ միլիոն եվրոն։ Ամենաթանկ ֆուտբոլիստը թուրքական «Իսթանբուլսպորի» կենտրոնական հարձակվող Ժետմիր Թոփալին է, որի տրանսֆերային արժեքը կազմում է 850 հազար եվրո։ Հայաստանի ազգային հավաքականի ճամբարում գտնվող 25 ֆուտբոլիստների տրանսֆերային հանրագումարը կազմում է 8․8 միլիոն եվրո։ Մեր ազգային թիմում ունենք միանգամից 4 ֆուտբոլիստների որոնց տրանսֆերային արժեքը գերազանցում է մեկ միլիոն եվրոն։ Ըստ Տրանսֆերմարկետ պարբերականի 1․2 միլիոն տրանսֆերային արժեքը ունեն «Պոգոնի» կիսապաշտպան Վահան Բիչախչյանը, Վլադիկավկազի «Ալանիայի» կիսապաշտպան Արթուր Գալոյանը, ինչպես նաև թիմի ավագ, կիպրական «Անորտոսիսի» պաշտպան Վարազդատ Հարոյանը։ «Աստանայի» ներկայացուցիչ Կամո Հովհաննիսյանի տրանսֆերը գնահատված է մեկ միլիոն եվրոյով։
Ի տարբերություն Կոսովոյի, Հայաստանի հավաքականում այս պահին գտնվում են ընդամենը 8 լեգեոներներ։ Կարճ ասած նախապատվությու տալով Հայաստանում ելույթ ունեցող ֆուտբոլիստներին և երիտասարդ կադրերին Ռոման Բերեզովսկին նպատակ է հետապնդում Եվրոպայի առաջնության ընտրական փուլի մեկնարկից առաջ ի հայտ բերելու նոր խաղացողների որոնք կարողս են օգտակար լինել գլխավոր թիմին։ Ծանոթանալով Կոսովոյի հավաքականին կարող ենք ասել, որ մեր առաջիկա մրցակիցը կարգով մոտ է և Հայաստանի ազգային թիմը ունի հաղթելու իրական հնարավորություն։
Վերջին խաղում Կոսովոյի հավաքականը սեփական հարկի տակ 5։1 հաշվով առավելության է հասել Կիպրոսի նկատմամբ։ Ազգերի լիգայի ավարտված վերջին խաղարկությունում Կոսովոն ելույթ է ունեցել C դիվիզիոնում։ Բացի Կիպրոսից Կոսվոյի հետ միևնույն խմբում են եղել նաև Հունաստանի և Հյուսիսային Իռլանդիայի հավաքականները։ 6 խաղում վաստակելով 9 միավոր մեր առաջիկա մրցակիցը ենթախմբում զբաղեցրել է 2-րդ հորիզոնականը և պահպահել դիրքը C դիվիզիոնում։