Հաջորդ շաբաթ Արցախի ԱԺ-ն արտահերթ նիստ կգումարի ««Ընտրական օրենսգրքում լրացումներ և փոփոխություններ կատարելու մասին» և «Հանրաքվեի մասին» օրենքում փոփոխություններ կատարելու մասին» (օրենքների նախագծերի փաթեթ) նախագծերի շրջանակում:
Արցախի ԱԺ պետաիրավական հանձնաժողովի նախագահին Սևակ Աղաջանյանը «Առաջին լրատվական»-ի հետ զրույցում, անդրադառնալով նիստի օրակարգին, նշեց, որ ընդամենը կապված է այն արցախցիների հետ, որոնք այս պահին Արցախում չեն, Հայաստանում են, թե ինչպես պետք է մասնակցեն հանրաքվեին:
Արցախի Ազգային ժողովի «Ազատ հայրենիք-ՔԴՄ» խմբակցության ղեկավար Արթուր Հարությունյանը «Առաջին լրատվական»-ի հետ զրույցում մանրամասնեց, որ արտահերթ նիստը կապված է առաջիկայում Սահմանադրական փոփոխությունների և կազմակերպվելիք հանրաքվեի հետ: Հարությունյանը, սակայն, դժվարացավ նշել՝ ժամկետներ, թե երբ են նախատեսվում հանրաքվեն:
«Մենք նախաձեռնել ենք Սահմանադրական փոփոխություններ, որը պետք է հանրաքվեով իրականացվի: Կան տեխնիկական խնդիրներ, որ պետք է փոփոխվեին, դրա համար նախաձեռնել ենք այս փոփոխությունները ընդհանուր հանրաքվեի և ընտրությունների հետ կապված»,-ասաց նա:
Հարությունյանը նշեց, որ այս պահին սպասում են սահմանադրական դատարանի եզրակցությանը սահմանադրական փոփոխությունների փաթեթի հետ կապված, որից հետո նոր կհայտարարեն հանրաքվեի օրը:
Արցախի Հանրապետության Սահմանադրության փոփոխության նախագծով առաջարկվում է ամրագրել սահմանադրաիրավական փոփոխությունների իրականացման առավել ճկուն գործիքակազմ՝ այդ կերպ կանխելով սահմանադրական հնարավոր ճգնաժամերը՝ հաշվի առնելով աշխարհաքաղաքական զարգացումները, Արցախի Հանրապետության ռազմաքաղաքական ներկայիս իրավիճակը, ներքին և արտաքին սպառնալիքները: Սահմանադրաիրավական փոփոխությունների ճկունությունն ապահովելու նպատակով առաջարկվում է վերանայել Սահմանադրության փոփոխման եղանակներին առնչվող իրավակարգավորումները՝ անփոփոխ թողնելով գործող Սահմանադրության 163-րդ հոդվածը, համաձայն որի՝ Սահմանադրության 1-4-րդ և 163-րդ հոդվածները փոփոխման ենթակա չեն:
Արդյունքում առաջարկվում է սահմանել, որ Սահմանադրությունը և Սահմանադրության 175-րդ հոդվածում. Արցախի Հանրապետության իրավազորության սահմանները. փոփոխություններն ընդունվում են միայն հանրաքվեով՝ անփոփոխ թողնելով Սահմանադրություն ընդունելու, փոփոխելու նախաձեռնության իրավունք ունեցողների շրջանակը:
Նախագծով, միաժամանակ, առաջարկվում է սահմանել, որ Սահմանադրության մյուս հոդվածներում փոփոխություններն ընդունում է Ազգային ժողովը՝ պատգամավորների ընդհանուր թվի առնվազն մեկ երրորդի, Հանրապետության նախագահի կամ ընտրական իրավունք ունեցող քաղաքացիների առնվազն հինգ տոկոսի նախաձեռնությամբ՝ պատգամավորների ընդհանուր թվի ձայների առնվազն երկու երրորդով ընդունված որոշմամբ:
Պատգամավորի խոսքով՝ անցումը կլինի կիսանախագահականի: Սուպերնախագահական համակարգն Արցախում իրեն չարդարացեց, եթե արդարացներ, չէին փոխի:
Հարությունյանը նշեց, որ 100.000 ընտրող ունեն:
Անդրադառնալով հարցին, թե Ռուբեն Վարդանյանի՝ Արցախի պետնախարար նշանակվելուց հետո Արցախում սկսվել է իշխանափոխության գործընթաց՝ պատգամավորը նշեց, որ իրականությանը ընդհանրապես չի համապատասխանում, այդպիսի բան չկա, թիմային համախմբված, համակարգված աշխատանք է կատարվում: