Շարունակվում են Պաշտպանության նախարարության նախաձեռնած հրաձգության դասընթացը: Մասնակիցների հերթական խումբը, անցնելով հատուկ պատրաստվածության դասեր և ստանալով համապատասխան գիտելիքներ, իրականացրեց հրաձգության գործնական պարապմունք:
ՀՀ պաշտպանության նախարարության մամուլի քարտուղար Արամ Թորոսյանը ասաց, որ հրաձգության դասընթացները մեկնարկել են նոյեմբերի 5-ին և նախատեսված են զինվորական ծառայություն չանցած քաղաքացիների համար:
«Մինչ գործնական պարապմունքին անցնելը, մասնակիցները՝ փորձառու զինվորականների օգնությամբ նախ ծանոթանում են զենքի կառուցվածքին, մարտավարատեխնիկական բնութագրին: Առանցքում նշանառությունն է, զենքի օգտագործումը, անվտանգության կանոնների ուսուցումը, պահեստատուփերի լիցքավորումը և լիցքաթափումը, զենքի քանդումն ու հավաքումը, կրակային դիրքի զբաղեցումը»,- ասաց Արամ Թորոսյանը։
Նա ընդգծեց, որ դասընթացներին մասնակցելու համար հայտ էր ներկայացրել շուրջ 1500 քաղաքացի, որից 1300-ը իգական, իսկ 200-ն՝ արական սեռի ներկայացուցիչներ են։
Պաշտպանության նախարարության մամուլի քարտուղարը նկատեց, որ մեկնարկից մինչ այսօր մասնակիցների կողմից եղել են միայն դրական արձագանքներ:
«Մասնակիցների աշխատանքային հնարավոր զբաղվածությունը հաշվի առնելով՝ հրաձգության դասընթացներն անցկացվում են շաբաթ և կիրակի օրերին։ Պաշտպանության նախարարության տրանսպորտային միջոցներով մասնակիցները հավաքակայանից տեղափոխվում են հրաձգարան»,- ասաց Արամ Թորոսյանը։
Մասնակիցները ապահովվում են սննդով և բոլոր հարմարություններով: Լավագույն արդյունքներ գրանցողները խրախուսվում են:
