Մեկ տարի առաջ Գյումրիում «Բալասանյան դաշինք» սոցիալիստական կուսակցության և ՔՊ-ի միջև համագործակցության հուշագիր ստորագրեցին, որով կողմերը պարտավորվեցին իրականացնել համաձայնեցված կադրային քաղաքականություն` այդպիսով ստանձնելով համատեղ պատասխանատվություն քաղաքի կառավարման համար։ Այսօր, սակայն, Գյումրու ավագանու նիստում երկու կարևոր հարցերի քվեարկության ժամանակ Բալասանյան դաշինք-ՔՊ կոալիցիան իրար հակառակ քվեարկեցին:
Այս առնչությամբ «Ասպարեզ» լրագրողների ակումբի ղեկավար Լևոն Բարսեղյանը «Առաջին լրատվական»-ի հետ զրույցում նշեց, որ դրանք սկզբունքային հարցեր էին. Խոսքն ապօրինի կառույցների օրինականացման մասին էր, որին կողմ էր «Բալասանյան դաշինքը», իսկ ՔՊ-ն դեմ էր, այդ հարցը չանցավ, մյուսը վաճառքի դրվող հողերի մասին էր:
«Բավականին ծավալուն քննարկում եղավ: Պնդում էին, որ սովորաբար հաջորդիվ, որ դնում ենք աճուրդի, ավելի էժան ենք դնում, հետո վերավաճառում են թանկ: Հակաճառություն եղավ, որ դե մարդու սեփականությունն է, ինքն էլ հետո վաճառում է, իսկ հաջորդին չեն ուզում գալ, մասնակցել նրանք, որոնք ուզում են գնել նույնիսկ թանկ գնով: Այդ երկու հարցի քննարկման ժամանակ հակադիր կարծիքներ եղան, թեթև վիճաբանություն եղավ: Մտածեցի, որ ինչ-որ պրոցեսներ են ընթանում, բայց դեռ պարզ չէ: Այսօր հաղորդման եմ հրավիրել, տեսնեմ ովքեր կգան տարբեր խմբակցություններից»,-ասաց նա:
Հարցին, թե մինչև հիմա այդ երկու խմբակցությունները սինխրոն աշխատում էի՞ն, Լևոն Բարսեղյանը պատասխանեց. «Սինխրոն, բայց ոչ արդյունավետ: Օրինակ, եթե 5-ամյա զարգացման ծրագիրը բացեն նայեն, թե ինչ են նախատեսել 2022-ի համար, կտեսնեն բաներ, որոնք դեռ չեն արվել, իսկ տարին վերջանում է:
Քաղաքի կառավարումը, իմ կարծիքով, ավելի արդյունավետ կարող էր լինել, բազմաթիվ խնդիրներ շարունակել են մնալ: Քննարկումներ են եղել, խորհուրդ են հարցրել, ես իմ հասկացածի չափով առաջարկություններ եմ արել, առաջարկություններ եմ տարել տեղական տուրքերի ու վճարների փոփոխման մասին 5-ամյա զարգացման ծրագրի նախագծի քննարկման ժամանակ: Մանրամասն գրել, ուղարկել եմ, դրանցից չնչին մաս են վերցրել: Նույնիսկ այն, ինչը գրվել է 5-ամյա զարգացման ծրագրի մեջ, շատ վատ ու անարդյունավետ է իրականացվել: Օրինակ, այս տարի երկու թանգարան պետք է բացվեր այդ ծրագրով, որը չի արվել»,-ասաց նա:
Բարսեղյանն անդրադարձավ նաև անարդյունավետ ծախսերին. «Օրինակ, պահակները վաղուց կարող էին փոխարինված լինել տեխնիկական միջոցներով և անհամեմատ էժան կնստեր ՀՈԱԿ-ների պահպանության ծախսը: Դա վերաբերելի է ոչ միայն Գյումրիին, Հայաստանի բոլոր քաղաքներում այդ անարդյունավետ ծախսերի կամ անարդյունավետ կառավարման խնդիրը վաղուց կա ու չի լուծվում: Գումարած, աղքատ են համայնքները, պետությունն էլ խտրականություն է կիրառում մայրաքաղաքի համեմատ»:
Նրա խոսքով՝ այսօր բաշխումը խտրական է և Երևանում մեկ շնչին ընկնող համայնքային բյուջեն 2-3 անգամ գերազանցում է այլ համայնքներում միջին ընկնող համայնքային բյուջեին: «Դա մեծ հնարավորություններ է տալիս Երևան համայնքին այդ ծառայությունների մի մասն ունենալ անվճար: Ասենք, Երևանում մանկապարտեզները անվճար են: Ոչ մեկի մտքով չի անցնում դիմել խորհրդարանին, համահարթեցման բանաձևը փոխել տալ, որ Հայաստանի բոլոր մանկապարտեզահասակ երեխաները հավասար պայմաններով հաճախեն մանկապարտեզ: Բոլոր երեխաներն ունենան մանկապարտեզի հնարավորություն: Մեն համայնքների մեծ մասում երեխաները հասանելի մանկապարտեզ չունեն: Եթե անգամ ծնողը փող էլ ունենա վճարելու, այդ երեխայի հասանելիության շառավղում մանկապարտեզ չկա, էլ ուր մնաց անվճար լինի: Սրանք հարցեր են, որոնք ազդում են ժողովրդագրության վրա, համաչափ զարգացման վրա»:
Նախորդը մասնակի բացահայտվեց, բայց ամբողջությամբ չի բացահայտված Ավետիսյանների սպանությունը: Քանի դեռ մոտիվը չի բացահայտված, ես և շատ-շատերը համարում ենք, որ չի բացահայտված ամբողջությամբ:
