Այսօր ամերիկյան The Washington Times թերթը հրապարակել է մի հոդված, որը վերաբերում է Հայաստանին առնչվող գաղտնի փաստաթղթին: Մենք երեկ արդեն տեղեկացրել էինք, որ WikiLeaks կայքը տեղադրել էր մի փաստաթուղթ, որտեղ ամերիկյան պետքարտուղարությունը Հայաստանին մեղադրում է իր տարածքից Իրանին զենք և զինամթերք վաճառելու համար: Նույն թեմային, ինչպես նաև կայքում տեղադրված մի շարք ուշագրավ փաստաթղթերի, անդրադարձել է նաև ամերիկյան թերթը:
Հայաստանից զենքի փոխանցումը Իրան միայն մեկ օրինակն է այն 250,000 գաղտնի փաստաթղթերից, որոնք հրապարակվել են կայքում, և որոնք վերաբերում են դաշնակիցների և հակառակորդների կողմից Իրանին զենք վաճառելը կանխելու ԱՄՆ կառավարության ջանքերին:
Երկուշաբթի Իրանի նախագահ Մահմուդ Ահմանինեժադը հայտարարել է, որ փաստաթղթերը, որոնք WikiLeaks-ի կողմից հրապարակվել են, Կենտրոնական հետախուզական վարչության և իսրայելական Մոսադի կողմից սանձազերծված արշավի մի մասն են: Այն, որ, ըստ փաստաթղթերի, արաբական երկրների շատ ղեկավարներ հորդորել են ԱՄՆ-ին՝ ռազմական գործողություններ սկսել Իրանի դեմ, Ահմադինեժադը անվանում է քարոզչություն: «Տարածաշրջանային երկրները մեկը մյուսին վերաբերվում են՝ ինչպես ընկերների և եղբայրների»,- ասել է նա: «Վնասաբեր այս քայլերը չեն վտանգի նրանց հարաբերությունները»:
Պետքարտուղար Հիլարի Քլինթոնը Վաշինգտոնում երեկ հայտարարել է, որ այս հրապարակումները չեն ազդի ԱՄՆ-ի և նրա դաշնակիցների հարաբերությունների վրա: Նա նույնպես ասել է, որ այս բացահայտումները վտանգում են այն փակ հասարակություններում ապրող մարդկանց, որոնց հետ ԱՄՆ դիվանագետները շփվել են: «Ոչ մի գովաբանական բան չկա մարդկանց վտանգելու մեջ, և քաջություն չէ ժողովուրդների միջև խաղաղ գործընթացները, որոնց վրա հիմնված են մեր ընդհանուր անվտանգության պահանջները, սաբոտաժի ենթարկել»,- ասել է Քլինթոնը:
Քլինթոնը նաև նշել է, որ Օբամայի վարչակազմը քայլեր է ձեռնարկում արտահոսքի մեղավորներին պարզելու համար:
Ըստ թերթի, հայկական այս միջադեպը ԱՄՆ-ի ավելի մեծ ջանքի մի մասն է կազմել` կանխելու Իրանի հասանելիությունը զենքի և դրա արտադրության տեխնոլոգիաների համաշխարհային շուկային: ԱՄՆ կառավարությունը նմանատիպ քայլեր արել է նաև Չինաստանի կառավարության փորձերի դեմ` կանխելու համար Իրանին հիրոսկոպների վաճառքը:
