«Երևանյան հեռանկարներ» միջազգային երաժշտական 23-րդ փառատոնի շրջանակներում նոյեմբերի 8-ին «Արամ Խաչատրյան» համերգասրահում տեղի ունեցավ վիրտուոզ դաշնակահար Նիկոլայ Լուգանսկիի և Մոնրեալի սիմֆոնիկ նվագախմբի դիրիժոր և գեղարվեստական ղեկավար Շառլ Դյութուայի համերգը:
Երեկոյին Հայաստանի ազգային ֆիլհարմոնիկ նվագախմբի նվագակցությամբ հնչեցին Ֆրեդերիկ Շոպենի Դաշնամուրի կոնցերտ թիվ 2, Էկտոր Բեռլիոզի Ֆանտաստիկական սիմֆոնիա ստեղծագործությունները:
Լեփ-լեցուն դահլիճը բուռն ծափահարություններով, «բրավո», «բիս» վանկարկումներով մի քանի անգամ ստիպեց երաժիշտներին վերադառնալ բեմ, և Նիկոլայ Լուգանսկին արդեն առանց նվագախմբի նվագակցության նվագեց՝ նորից արժանանալով ջերմ ծափահարությունների:
Ավել վաղ Շառլ Դյութուան, որն ավելի քան 40 միջազգային մրցանակների, այդ թվում երկու «Գրեմմիի» դափնեկիր է, նշել էր, որ 15 տարի առաջ որպես զբոսաշրջիկ է այցելել Հայաստան: «Երևանը տարիների ընթացում ավելի է գեղեցկացել: Այստեղ հաճախ ես հանդիպում ժպտերես ու երջանիկ մարդկանց»,-նշել էր Դյութուան:
Որպես դիրիժոր նա առաջին անգամ էր հանդես գալիս Երևանում: Երաժիշտը խոստովանել էր, որ իրեն դուր է գալիս Հայաստանի ազգային ֆիլհարմոնիկ նվագախմբի հետ աշխատանքը, Նիկոլայ Լուգանսկիի հետ ելույթ ունենալը:
Ռուսաստանի ժողովրդական արտիստ, ՌԴ պետական մրցանակի դափնեկիր Նիկոլայ Լուգանսկին էլ շեշտել էր, որ բազմաթիվ հայ երաժիշտների հետ է համագործակցում և բարձր է գնահատում աշխարհահռչակ հայ կոմպոզիտորներին, մենակատարներին: «Արամ Խաչատրյանն իմ սիրած կոմպոզիտորներից է: Չեմ կարող չհիշել նաև Բաբաջանյանին, Տերտերյանին, որոնց գործերը շատ հետաքրքիր են: Մոսկվայում շատ են հայ երաժիշտները, որոնց հետ աշխատում եմ: Նրանցից են թավջութակահար Նարեկ Հախնազարյանը, Սերգեյ Բաբայանը, որը ֆանտաստիկ դաշնակահար է»,-ընդգծել էր Լուգանսկին:
Նա պատմել էր, որ իր ծնողները երաժիշտներ չեն, սակայն շատ են սիրել երաժշտություն: Ընտանեկան լեգենդի համաձայն՝ երիտասարդ տարիքում Լուգանսկիի մայրը դաշնակահարի հորը հրավիրել է Մոսկվայի մեծ թատրոն՝ ունկնդրելու Վերդիի «Տրավիատա» օպերան: Դաշնակահարի հոր ամենասիրելի օպերան հենց «Տրավիատա»-ն է եղել, և նրան այնքան է տպավորել այն, որ երիտասարդ աղջիկն իրեն հրավիրել է դիտելու այդ օպերան, որ որոշ ժամանակ անց նրան ամուսնության առաջարկություն է արել: «Ինքս դժվարանում եմ ասել, թե որ ստեղծագործությունն է ինձ շատ ոգևորել ու կարևոր որոշումներ կայացնելու առիթ տվել, սակայն հիշում եմ, որ իմ կյանքում կար մի շրջան, երբ ընկճված էի: Հենց այդ ընթացքում ունկնդրում էի Սիբելիուսի 7-րդ սիմֆոնիան, ինչն ինձ երջանկացնում էր»,-խոստովանել էր դաշնակահարը:
«Երևանյան հեռանկարներ» միջազգային երաժշտական 23-րդ փառատոնի աշնանային համերգաշարը մեկնարկել է սեպտեմբերի 12-ին անվանի ջութակահար Սերգեյ Խաչատրյանի և Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանի համերգով: Համերգաշարի մեկնարկային համերգը նվիրված է եղել Եվրոպական փառատոնային ասոցիացիայի 70-րդ հոբելյանական գագաթնաժողովին և Արվեստի միջազգային համաժողովին: