Կոսովոյի և Ալբանիայի դեմ ընկերական հանդիպումներին Հայաստանի ազգային հավաքականը կխաղա լեգենդար դարպասապահ Ռոման Բերեզովսկու գլխավորությամբ։ Հիշեցնենք, որ նոյեմբերի 16-ին մեր ազգայի թիմը կհյուրընկալվի Կոսովային, իսկ երեք օր անց՝ Ալբանիային։ Արդեն 2023 թվականի մարտին մեր հավաքականը սկսելու է պայքարը Եվրոպայի առաջնության ընտրական փուլում։ Հենց մեկնարկային խաղում, մարտի 25-ին Երևանում մրցելու ենք Թուրքիայի հավաքականի հետ։ Առաջինա երկու հանդիպումները ըստ էության վերջին ստուգարնքն են սկզբունքային մրցավեճից առաջ։ Լավագույն դեպքում Հայաստանի հավաքականը ևս մեկ ընկերական խաղ կարող է անցկացնել Թուրքիայի դեմ մրցավեճի նախօրեին։ Ազգերի լիգայում անհաջող ելույթից հետո Հայատանի ֆուտբոլի ֆեդերացիան չերկարաձգեց պայմանագիրը իսպանացի մասնագետ Խոակին Կապառոսի հետ։ Վերջինիս հետ պայմանագիրը նախատեսված էր մինչև այս տարվա նոյեմբերը։ Սեպտեմբերի 29-ին ՀՖՖ-ն որոշեց ժամանակից շուտ դադարեցնել համագործակցությունը Կապառոսի հետ։ Սպասվում էր, որ Կոսովոյի և Ալբանիայի դեմ հանդիպումները ֆուտբոլի ֆեդերացիան պայմանագիր կկնքի նոր մարզչի հետ։
Մամուլում շրջանառվում էին գլխավոր մարզչի մի քանի թեկնածուների անուններ, բայց․․․։ Ֆուտբոլի ֆեդերացիան որոշում կայացրեց ընկերական խաղերում ազգային թիմը վստահել Ռոման Բերեզովսկուն։ Սա միանգամայն ճիշտ որոշում էր, հաշվի առնելով մեր ազգային թիմի ներկայիս վիճակը։ 1996 թվականի օգոստոսի 31-ին Հայաստանի ազգային հավաքականը աշխարհի առաջնության ընտրական փուլի մեկնարկային խաղում Երևանում ոչ-ոքի 0։0 խաղաց Պորտուգալիայի հետ։ Այս մրցավեճում մեր երկրի գլխավոր թիմում իր նորամուտը նշեց 22-ամյա Բերեզովսկին։ Վերջինիս ֆանտաստիկ խաղի շնորհիվ մեր հավաքականը միավոր վաստակեց հզոր մրցակցի դեմ մրցավեճում։ Շուրջ 20 տարի Հայաստանի դարպասը պաշտպանելուց հետո Ռոման Բերեզովսկին վերջին տարիներին մեր ազգային թիմի դարպասապահների մարզիչն է։ Կարճ ասած շուրջ 27 տարի Ռոման Բերեզովսկին Հայաստանի հավաքականում է։ Այսօր իսկապես դժվար է գտնել մի մասնագետի, որը ավելի լավ կճանաչի մեր հավաքականը քան Բերեզովսկին։ «Շատ է խոսվում, որ նոր մարզիչը նույնպես իսպանացի է լինելու: Մենք ուշադրություն չենք դարձնում մարզչի ազգությանը, սակայն կարևորում ենք նրա փիլիսոփայությունը: Խոակին Կապառոսի ընտրության ժամանակ նույնպես եղել են ոչ իսպանացի թեկնածուներ: Կոնկրետ չափանիշներ չկան. ցանկանում ենք հավաքականում տեսնել փորձառու մարզիչ: Հիանալի կլիներ, որ առաջիկա ընկերական խաղերին ունենայինք մարզիչ, սակայն չենք ցանկանում շտապել և մտադիր ենք մանրակրկիտ բանակցել, որպեսզի ապագա մարզիչը հասկանա իր առաքելությունը: Շատ ենք ուզում, որ հավաքականում մնան Ռոման Բերեզովակին ու Խավիեր Մինյանոն: Շատ մասնագետներ, որոնց հետ բանակցում ենք, դեմ չեն լինի մարզչական շտաբում նման փորձառու մարզիչներ ունենալուն»-, Vnews-ին տված հարցազրույցում ասել է ՀՖՖ-ի նախագահ Արմեն Մելիքբեկյանը:
Վերջինիս խոսքերից դժվար չէ ենթադրել, որ մարզչի փնտրտուքը ցանկալի հունով չի ընթանում։ Բնական է, տեսնելով մեր հավաքականի արդյունքները, ռեսուրսը, շատ մասնագետներ ուղղակի մերժում են ՀՖՖ-ի առաջարկը։ Այո, ներկայիս գործիքակազմով նունիսկ անհնարին է թվում Եվրո-2024-ի ուղեգրի համար պայքարելը։ Հետևաբար, մարզիչ չգտնելու կամ հապաղելու մեջ ֆուտբոլի ֆեդերացիային մեղադրելը կարծում ենք ճիշտ չի լինի։ Բարդ իրավիճակում վստահելով Ռոման Բերեզովսկուն ՀՖՖ-ն լուծեց կարևոր մի խնդիր։ Թուրքիայի դեմ մեկնարկային խաղում կունենանք մարզիչ, որը 5 մատի պես ճանաչում է մեր ազգային թիմին։ Այո, խիստ կարևոր խաղում Հայաստանի հավաքականը դե ֆակտո պետք է խաղա հենց Բերեզովսկու գլխավորությամբ։ Եթե ՀՖՖ-ն արկերկրից հրավիրի նոր գլխավոր մարզչի, վերջինս ֆիզիկապես և տեխնիկապես ուղղակի հնարավորություն չի ունենա ծանոթանալու ֆուտբոլիստների հետ, ներդնելու խաղային սխեմա, նույնիսկ ինքնուրույն հիմնական կազմ ընտրելու։ Հետևաբար թեկուզ ժամանակավորապես ստանձնելով մեր հավաքականի գլխավոր մարզչի պաշտոնը Ռոման Բերեզովսկին իր վրա է վերցրել մեծ պատասխանատվություն։
Կարծում ենք պարզ է, որ թուրքերի դեմ մեկնարկային խաղում բավական մեծ է լինելու հայկական ֆուտբոլի կենդանի լեգենդի դերը։ Չի կարելի բացառել նաև, որ Կոսովոյի և Ալբանիայի դեմ ընկերական հանդիպումներից հետո օրակարգում հայտնվի այս մասնագետին գլխավոր մարզիչ նշանակելու հարցը։ Հաջողություն ենք մաղթում Ռոման Բերեզովսկուն առաջիկա հանդիպումներում։
