Արթուր Դավթյանը նոր էջ բացեց հայկական մարմնամարզության պատմության մեջ։ Լիվերպուլում տեղի ունեցած աշխարհի առաջնությունում հայ մարմնամարզիկը նվաճեց ոսկե մեդալ։ Նախօրեին էլ Հայաստանի մեկ այլ ներկայացուցիչ Հարություն Մերդինյանը նժույգ-թափերի վարժությունում գրավել էր երրորդ հորիզոնականը՝ երկրորդ անգամ նվաճելով աշխարհի առաջնության բրոնզե մեդալը: «Հայաստանի Հանրապետության օրհներգը առաջին անգամ հնչեց սպորտային մարմնամարզության աշխարհի առաջնություններում։ Շնորհակալություն հենացատկի աշխարհի չեմպիոն, մարմնամարզիկ Արթուր Դավթյանին»,- ֆեյսբուքյան իր էջում գրել է ՀՀ վարչապետ Նիկոլ Փաշինյանը։ Հենացատկ ձևում Եվրոպայի չեմպիոն, Օլիմպիական խաղերի բրոնզե մեդալակիր Արթուր Դավթյանը, հավաքեց 15.000 միավոր։ Այս տարվա հունվարին ԿԳՄՍ պաշտոնական կայքին տված հարցազրույցում հայտարարել էր, որ գլխավոր նպատակն աշխարհի առաջնությունից մեդալով վերադառնալն է. «Եվրոպայի առաջնությունից և օլիմպիական խաղերից մեդալ ունեմ, իսկ աշխարհի առաջնությունից՝ ոչ: Այս տարվա գերնպատակս հենց դա է լինելու: Մեդալի գույնն անգամ այդքան չեմ կարևորում»:
Արթուր Դավթյանը փառահեղ ելույթով նպատակը դարձրեց իրականություն։ 2022 թվականին սա Դավթյանի և ընդհանրապես հայկական մարմնամարզության միակ հաջողությունը չէ։ Ամռանը ՀՀ սպորտային մարմնամարզության պատմության մեջ առաջին անգամ աշխարհի բացարձակ գավաթակիրներ դարձան Արթուր Դավթյանը (հենացատկ) և Վահագն Դավթյանը (օղակներ): «Մեր տղաները, մասնակցելով աշխարհի գավաթների չորս փուլերից երեքին կարողացան նվաճել բացարձակ հաղթողի կոչումը»․- ասված էր Հայաստանի մարմնամարության ֆեդերացիայի հայտարարության մեջ: Հիշեցնենք, որ փուլերից վերջինը տեղի էր ունեցել Բաքվում, որին մեր հավաքականը հասկանալի պատճառով չէր մասնակցել։ Մասնակցության պարագայում մերոնց արդյունքները անհավանական բարձր կլինեին։ Ի դեպ, մեր մարզիկների մեդալներն ու մրցանակները Բաքվից գնացքով ուղարկվել էին Երևան։ Արդեն օգոստոսին Մյունխենում կայացած մամրմամարզության Եվրոպայի առաջնությունում Հայաստանի ներկայացուցիչները հերթական փայլուն հաջողությունն էին գրանցել։ Արթուր Դավթյանը հենացատկում 14.983 միավոր։ Նույնքան միավոր էր հավաքել նաեւ բրիտանացի Ջեյք Ջերմանը, սակայն մրցավարների ոչ միանշանակ որոշման արդյունքում մեր մարզիկը արժանացավ արծաթե մեդալի։ 2016-ի Եվրոպայի չեմպիոն 38-ամյա Հարություն Մերդինյանը նժույգ թափեր վարժությունում հավաքել էր 14.733 միավոր հռչակվելով Եվրոպայի չեմպիոն: Ի դեմս Մերդինյանի Հայաստանն ու մարմնամարզության Եվրոպայի կրկնակի չեմպիոն և աշխարհի առաջնության կրկնակի բրոնզե մեդալակրի: Ի դեպ, այս տարվա հուլիսին Արթուր Դավթյանի անվան տարրը գրանցվել էր մարմնամարզության միջազգային ֆեդերացիայում:
Եգիպտոսի մայրաքաղաք Կահիրեում կայացած Աշխարհի գավաթում Արթուր Դավթյանը նժույգ թափեր մարզագործիքի վրա կատարել էր նոր տարր, որն արդեն պաշտոնապես անվանվել է Դավթյան: Հայ մարմնամարզիկներից իրենց անունով կատարած տարրեր ունեն՝ Հրանտ Շահինյանը (նժույգ թափեր), Ալբերտ Ազարյանը (օղակներ), Արթուր Հակոբյանը (հենացատկ), Վահագն Ստեփանյանը (նժույգ թափեր), Վահագն Դավթյանը (օղակներ), Հուռի Գեբեշյանը (տ/բ զուգափայտ)։ «Աշխարհի գավաթի խաղարկությունը շատ հաջող ստացվեց ամբողջ թիմի համար: Արթուր Դավթյանը և Վահագն Դավթյանն արդեն իսկ հավաքել են պահանջված միավորները: Մեր առաջնային խնդիրն աշխարհի առաջնության համար առաջացած խնդիրը լուծելն էր։ Օլիմպիական այս շրջանը լինելու է Արթուր Դավթյանինը: Նա հաջորդ մրցաշարերում ամենալավ արդյունքն է գրանցելու: Դավթյանը հրաշալի է տիրապետում ցատկերին»,- Դոհայում տեղի ունեցած մրցաշարից հետո ասել էր մարմնամարզության Հայաստանի հավաքականի գլխավոր մարզիչ Հակոբ Սերոբյանը։
Վերջինիս պնդումները իրականություն են դառնում։ Արթուր Դավթյանը արդեն իսկ գրանցել է պատմական՝ ֆանտաստիկ արդյունք։ Հիմա արդեն մեր լեգենդար մարզիկի հինական նպատակը պետք է լինի 2024 թվականի Փարիզի օլիմպիական խաղերի ոսկին։