ԱՀ նախագահ Արայիկ Հարությունյանի հրամանագրով գործարար Ռուբեն Վարդանյանը նոյեմբերի 4-ին ստանձնեց Արցախի պետնախարարի պաշտոնը՝ լայն լիազորություններով։ Ըստ այդմ՝ փոփոխություններ են կատարվել «Արցախի Հանրապետության պետական նախարարի կողմից նախարարների գործունեության համակարգման մասին» օրենքում, ինչից բխում է, որ Վարդանյանն, ի տարբերություն նախկին պետնախարարների, առավել շատ ոլորտներ է համակարգելու։
Արդյոք սա Արցախում իշխանության փոխանցման մի ձև է։ Ընդդիմադիր Արցախի Հեղափոխական կուսակցության նախագահ Արթուր Օսիպյանը գտնում է, որ դա կարծիք է, որը գոյության իրավունք ունի։ Միևնույն ժամանակ Օսիպյանն «Առաջին լրատվական»-ի հետ զրույցում ասաց․ «Իհարկե կարծիքները տարբեր են, բայց մյուս կողմից էլ՝ միգուցե մարդն իսկապե՞ս եկել է մեր երկրի համար բարի գործ անելու։ Մոտակա շաբաթների ու ամիսների ընթացքում արդեն պարզ կդառնա, թե ինչպես է աշխատում, կկարողանանք ավելի կոնկրետ մեկնաբանություններ տալ։ Ռուբեն Վարդանյանն էլ հասարակ ֆիգուր չէ, ոնց էլ չլինի՝ կապում են Կրեմլի, Բրիտանիայի հետ։ Պետք չէ այդ զրույցներին տրվենք, դրանք հաճախ իրականությանը չեն համապատասխանում։ Բայց այն, ինչ դուք ասում եք՝ տրամաբանական է, միտքը գոյության իրավունք ունի, մնացածը ապագան ցույց կտա»։
Հարցին, թե Արցախում ի՞նչ ակնկալիքներ կան Վարդանյանի հետ կապված, մեր զրուցակիցն ասաց․ «Իր դիրքորոշումը Արցախի հետ կապված, ընդհանրապես արտաքին քաղաքականության հետ կապված՝ կարող ենք առողջ մոտեցում համարել։ Մնացածը գործը ցույց կտա։ Այս ընթացքում հասցրել եմ նկատել, որ արտաքին քաղաքականության հետ կապված բալանսավորված մոտեցում ունի։ Համենայնդեպս հրապարակային խոսքում այդպես է երևում։ Այդ առումով եմ նշում, որ առողջ մոտեցման նմուշները կան»,-եզրափակեց նա։
Արցախում քաղաքական փոփոխություններ պահանջող «Վաղվա Արցախ» կուսակցության նախագահ Տիգրան Պետրոսյանն «Առաջին լրատվական»-ի հետ զրույցում ևս նշեց, որ որոշակիորեն կիսում է այն կարծիքը, որ այսպիսով Արցախում իշխանության փոխանցում է տեղի ունենում, քանի որ Վարդանյանին բավականին լայն լիազորություններ են փոխանցվում։ Մեր զրուցակիցը նաև գրառմամբ տեղեկացնում է, որ սպասում են Վարդանյանի հետագա քայլերին։ Ընդգծենք, որ նստացույց անող երիտասարդներին Արցախում գտնվող Վարդանյանը մի քանի անգամ հանդիպել է։ Տիգրան Պետրոսյանը նաև գրում է, որ ուշադիր հետևելու է Ռուբեն Վարդանյանի գործունեությանը, «և եթե հանկարծ պարզվի, որ նա ուղղակի այս կործանարար համակարգի հերթական «վարորդն» է, ապա առաջին քարը նրա բոստանը ես եմ նետելու»,-գրել է Պետրոսյանը։
