Կոնֆերենցիաների լիգայի խմբային փուլի վերջին տուրում, այսօր Հայաստանի չեմպիոն «Փյունիկը», Վազգեն Սարգսյանի անվան «Հանրապետական» մարզադաշտում կմրցի շվեյցարական «Բազելի» հետ։ Հաղթանակի դեպքում մեր թիմը գրանցելով պատմական արդյունք` դուրս կգա մրցաշարի 1/16-րդ եզրափակիչ։ Հիշեցնենք, որ այս թիմերի միջև Բազելուն տեղի ունեցած առաջին խաղում մեր թիմը պարտվել էր 1։3 հաշվով։ Եկել է ռևանշի հասնելու ժամանակը։ Կարճ ասած, այսօր ակումբային ֆուտբոլի մակարդակով տեղի կունենա անկախ Հայաստանի պատմության կարևորագույն խաղը։ Բուքմեյքերներն առաջիկա մրցավեճում ֆավորիտ են համարում «Բազելին»։ Վերջինիս հաղթանակի համար սահմանված է 1․8 գործակից։ Ոչ-ոքի գնահատված է 3․7, իսկ «Փյունիկի» հաղթանակը՝ 4․1 գործակցով։
«Փորձելու ենք խաղն այնպես կառուցել, որ առավելությունը մեր կողմը լինի: Այո, արտագնա խաղերում սովորաբար խնդիրներ ծագում են։ Չենք ցանկանում շատ մանրանալ։ Ամեն ինչ կորոշվի դաշտում և ես լիահույս եմ որ կհաղթենք»,- նախախաղային մամուլի ասուլիսում ասել է «Բազելի» գլխավոր մարզիչ Ալեքսանդր Ֆրայը։ Վերջինս անդրադարձել է նաև Բազելում կայացած առաջին հանդիպման հայտնի դրվագին, որից ծնվել էր դաշտի տերերի երկրորդ գոլը։ Մասնավորապես, «Փյունիկի» հարձակվող Յուրիչիչը վնասվածքի պատճառով պառկած էր խոստատածկին, իսկ «Բազելի» ֆուտբոլիստները չհետևելով Fair play-ի կանոններին շարունակել էին գրոհը և գրավել «Փյունիկի» դարպասը․ «Ես հիշում եմ, որ այդ իրավիճակից հետո երկրորդ գոլը եղավ: Դա մրցավարի խնդիրն էր: Եթե մրցավարը չընդհատեց խաղը, ապա արդարացի է գոլը: Բայց իմ ֆուտբոլիստներն այդքան էլ վատ տրամադրված չէին, չար չէին: Նրանց մտադրությունը չէր շարունակել խաղը»։ Չմոռանանք, որ այդ խաղին հաջորդած մամուլի ասուլիսում «Փյունիկի» գլխավոր մարզիչ Եղիշե Մելիքյանը հայտարարել էր, որ «Բազելը» լկտի պահվածի պատասխանը կստանա Երևանում։ Մելիքյանի խոսքով իրենց այսօ անելու են հնարավորն ու անհնարինը երկրպագուներին տոն պարգևելու համար։ «Մենք հյուրընկալ ազգ ենք: Թող մինչև խաղը վայելեն մեր երկիրը մեր հյուրերը, իսկ երբ որ խաղը սկսվեց, մենք մարտական տրամադրված ենք լինելու ու շատ մեծ ցանկությամբ իրենց հաղթելու: Մենք անելու ենք այն ինչ որ պարտավոր ենք՝ հաղթել ու գնալ առաջ: Մենք փորձառու թիմ ենք, լարվածություն չունենք, քանի որ դա մեզ խանգարելու է:
Մեր ցավալի խաղը, որ եղավ մի քանի օր առաջ, դա էլ կարողացանք վերապրել ու հիմա պրոֆեսիոնալ ձևով պատրաստ ենք վաղվա խաղին: Այո, զգում ենք պատասխանատվություն, քանի որ հարց պետք է լուծենք: Լարված չենք, ուղղակի պատրաստ ենք: Մրցավեճից առաջ լուրջ խնդիրներ չունենք։ Առաջիկա խաղին «դուխով» սպասում ենք, պայքարելու ենք մինչև վերջ՝ հաջողության հասնելու համար։ Մենք ունենք լավ մարզչական շտաբ ու պատրաստ ենք այս խաղին: Եթե ստացվի մեր պլանավորածը տեղափոխել խաղադաշտ, ուրեմն հաջողությունը մեզ հետ կլինի: Մենք պետք է մեր երկրպագուների համար տոն սարքենք ու դրական տրամադրությամբ հեռանանք մեկս մյուսից: Պարտության ու հաղթանակի դեպքում ես շատ հպարտ եմ, որ ունեմ այսպիսի թիմ: Այն նվիրվածությունը, որը ես զգում եմ որպես մարզիչ ֆուտբոլիստների մոտ, զգում եմ նաև երկրպագուների մոտ: Շատ շնորհակալ եմ երկրպագուներից, որ հավատում են մեզ ու աջակցում: Իսկ այն մասը, որոնք չեն աջակցում, կաշխատենք վաղը այնպես անել, որ փոխվի նրանց տրամադրվածությունը մեզ համար»,- նշել է Մելիքյանը։ Վերջին տուրից առաջ Սլովակիայի չեմպիոն «Սլովանը» 8 միավորով գլխավորում է H խմբի մրցաշարային աղյուսակը, «Բազելը» նույնքան միավորով երկրորդ տեղում է, իսկ «Փյունիկը» 6 միավորով 3-րդն է։ «Ժալգիրիսը» 5 միավորով եզրափակում է մրցաշարային աղյուսակը։ Վերջին տուրից առաջ բոլոր 4 թիմերը հնարավորություն ունեն դուրս գալու փլեյ-օֆֆ։
Եթե այսօր «Փյունիկը» վաստակի երեք միավոր, իսկ «Սլովանը» չհաղթի «Ժալգիրիսին», ապա մեր չեմպիոնը ենթախմբում կզբաղեցնի առաջին հորիզոնականը։ Այսօր միաժամանակ «Ժալգիրիսը» «Սլովանի» հետ մրցելու է Վիլնյուսում։ Այս թիմերի միջև առաջին տուրում տեղի ունեցած հանդիպումն ավարտվել էր ոչ-ոքի` 0։0։ Ինչևէ, «Փյունիկ» ֆուտբոլային ակումբը ակնկալում է, որ այսօր «Հանրապետական» մարզադաշտը լեփ-լեցուն է լինելու։ Երևանյան թիմը երկրպագուներին կոչ է արել մարզադաշտ գալ խաղից երկու ժամ առաջ։
