Այսօր Հայաստանի ամերիկյան համալսարանում Յակոբեան բնապահպանական կենտրոնը, ՀՀ տարածքային կառավարման և ենթակառուցվածքների նախարարությունը և ՀՀ շրջակա միջավայրի նախարարությունը համատեղ մեկնարեցին «Հայաստանում թափոնների կառավարման քաղաքականություն» Շվեդիայի կողմից ֆինանսավորվող 4-ամյա ծրագիրը։
Ծրագրի ղեկավար Հարություն Ալպետյանը ներկայացրեց ծրագրի երեք հիմնական նպատակները, որոնք են՝ տրամադրել աջակցություն ՀՀ ՇՄ նախարարությանը՝ ներդնելու Արտադրողի ընդլայնված պատասխանատվության համակարգ ՝ հիմնված ԵՄ լավագույն փորձի վրա, տրամադրել աջակցություն ՀՀ ՏԿԵ նախարարությանը՝ Սևան քաղաքում և այլ պիլոտային համայնքներում ներդնելու սկզբնաղբյուրում թափոնների տարանջատման համակարգ և աջակցել ոլորտում կարողությունների զարգացմանը և ընդլայնմանը։
Թափոնների կառավարման քաղաքականության կարևորությանն անդրադառնալով՝ ՀՀ ՏԿԵ նախարարի տեղակալ Վաչե Տերտերյանն ընդգծել է ՀՀ համայնքներում աղբահանության և կոշտ թափոնների կառավարման ինտեգրված համակարրգի ներդնումը՝ ներկայացնելով ծրագրի շրջանակներում ՀՀ Գեղարքունիքի մարզի Սևան համայնքի՝ որպես ծրագրի պիլոտային համայնք, ընտրելու հիմնավորումները։ Մասնավորապես այն փաստը, որ ՎԶԵԲ-ի աջակցությամբ իրականացվող «Կոտայքի և Գեղարքունիքի ԿԿԹԿ ծրագրի հետ համատեղ՝ այն ամբողջական կդարձնի տարածաշրջանում կոշտ թափոնների կառավարման ինտեգրված համակարգի ներդրման գործընթացը, դրա հետ մեկտեղ հաշվի առնելով համայնքի աշխարհագրական դիրքը և զբոսաշրջիկների հոսքը։ Նշվեց նաև, որ ծրագրի ընթացքում ձեռքբերված հաջողված փորձը նախատեսվում է կիրառել նաև հանրապետության մյուս համայնքներում։
Ըստ նախարարի տեղակալ Գայանե Գաբրիելյանի սա յուրահատուկ համագործակցություն է երկու երկրների և բուհի միջև՝ ի նպաստ երկրի կարևորագույն խնդիրներից մեկի լուծմանը.
«Թափոնների կառավարումն ըստ էության բնապահպանական օրակարգի և շրջանաձև տնտեսության կարևորագույն մասերից է, որն ամփոփում է կանաչ օրակարգի շրջանակը»։
«Ծրագրի կողմից մշակվող գործիքները և մոտեցումները կօգնեն կառավարությանը կատարել իր պարտավորությունները և առաջ տանել կանաչ տնտեսության օրակարգը», – հավելեց Հարություն Ալպետյանը։
Իմացե՛ք ավելին ծրագրի մասին անցնելով հղմամբ՝ https://ace.aua.am/hy/projects/waste_policy/