Կառավարությունը իր այսօրվա նիստում հավանություն տվեց «Զինվորական ծառայության և զինծառայողի կարգավիճակի մասին» օրենքում փոփոխություններ և լրացումներ կատարելու մասին» օրենքի նախագծին, որով առաջարկվում է ներդնել շարքային և սպայական կազմերի պարտադիր զինվորական ծառայությունից պայմանագրային զինվորական ծառայության անցման նոր համակարգ, որն անվանվելու է «Պաշտպան հայրենյաց» ծրագիր:
Այն նախատեսում է շարքային և սպայական կազմերի պարտադիր զինծառայության առաջին 6 ամիսը լրանալուց հետո կառավարության սահմանված կարգով պայմանագրային զինծառայության անցնելու հնարավորություն՝ ծառայության ժամկետը սահմանելով 5 տարի, ինչպես նաև պայմանագրի ժամկետը լրանալու կամ առողջական վիճակի պատճառով ոչ պիտանի ճանաչվելու հիմքով ծառայությունից ժամկետից շուտ արձակվելիս նրանց համար սահմանելով պատվովճար ստանալու իրավունք: Պատվովճարի չափը նախատեսվում է սահմանել 5 մլն դրամ, որը տնօրինվում է ազատորեն:
Հատկանշական է, որ պայմանագրի 5 տարին լրանալուց հետո զինծառայողը կարող է շարունակել ծառայել որպես սպա կամ հրաժարվել ծառայությունից։ Երկու դեպքում էլ կստանա 5 մլն դրամ պատվովճար, ինչպես նաև, եթե ծառայության ընթացքում առողջական խնդիրների պատճառով ժամկետից շուտ զորացրվի, կրկին այդ գումարը կտարամադրվի զինծառայողին։
Նիկոլ Փաշինյանն էլ նշել է, որ սա պրոֆեսիոնալ բանակին անցման քայլերից մեկն է: Նա հավելել է, որ եթե պարտադիր զինծառայողները 5 տարով պայմանագիր կնքեն և դառնան պայմանագրային զինծառայողներ, և անցնեն ատեստավորում, նրանց աշխատավարձը կկրկնապատկվի:
Այս առնչությամբ ռազմական փորձագետ Մհեր Հակոբյանը «Առաջին լրատվական»-ի հետ զրույցում նշեց, որ ինքը շատ դրական է գնահատում այս փոփոխությունը, և այն կարող է շատ գայթակղիչ լինել. «Տեսեք, 6 ամիս ծառայությունից հետո նոր պետք է անցում կատարես պայմանագրային 5-ամյա ծառայության: Եթե անցնում չկատարեիր, միևնույն է մնացած 1,5 տարին պետք է ծառայեիր: Այսինքն այդ 5 տարուց այդ 1,5 տարին արդեն գնաց: Մնաց ,5 տարի, որի մոտավորապես կեսը լինում ես արձակուրդում, տան և այլն, քանի որ 15 օր ծառայում ես, 15 օր՝ ոչ: Ստացվում է, որ դու գրեթե ավել չես ծառայում: Ընդհանուր ժամկետը 5 տարի է լինում, բայց եթե ազատ ժամանակը հանում ենք, գրեթե նույնն է ստացվում: Սա շատ լավ առաջարկ է, թող պայմանագրայինների ինստիտուտը զարգանա: Բացի դրանից, հաջորդ տարի թեև ատեստավորման հիմքով, բայց նախատեսվում է, որ աշխատավարձերը կրկնակի կբարձրանան»,-ասաց նա:
Փորձագետը նաև հավելեց, որ մարդ կա, որ կոնկրետ մասնագիտություն չունի, չգիտի՝ բանակից հետո ինչով զբաղվել, և իր համար սա կլինի բանակից հետո 3,5 տարի լավ աշխատավարձով աշխատանք. «Իհարկե, մարդ կլինի, որին սա չի գայթակղի, որը ուն մասնագիտութունը, շտապում է ավարտել ծառայությունը և զբաղվել իր մասնագիտությամբ: Ես ընդհանրապես, կողմ եմ, որ նման այլընտրանքային տարբերակներ շատ առաջարկվեն, որովհետև մեր հասարակությունը շատ տարբեր շերտեր ունի, շատ տարբեր մարդիկ կան, և ինչքան շատ լինեն տարբերակները, մարդը կարող է իր ցանկացածը դրա մեջ գտնել: Մարդը կարող է գնալ, բարձր աշխատավարձ ստանալ, սոցիալական երաշխիքներ ստանալ և այլն: Ամեն դեպքում այս ծրագրից վնաս չկա: Եթե, ասենք, հասարակության կողմից չընդունվեց, կհանեն, վնաս բոլոր դեպքերում չի լինի, իսկ օգուտ կարող է լինել»,-ասաց Մհեր Հակոբյանը:
Հարցին, թե ընդհանուր առմամբ, բանակում բարեփոխումներն իրենց դրական արդյունքը տվել են, թե ոչ, նա բացասական պատասխան տվեց. «Առայժմ ոչ: Իհարկե, քայլեր արվում են, և այդ առումով ես կողմ եմ, որ բանակային ծառայությունը դառնա ավելի հրապուրիչ: Ուղղակի այդ քայլերը արդյունք են տալու ժամանակի ընթացքում: Երբ Վազգեն Սարգսյանը 1996-ին ռազմական ակադեմիան ստեղծեց, 2000-ականների սկզբին առաջին սպաների խմբերը գնացին, այդ ժամանակ սպայի աշխատավարձը շատ բարձր էր: Դր արդյունքում ոլորտը լավ զարգացավ, բայց հետագայում, 2000—ականներից սկսած մինչև հիմա անկում է եղել: Հիմա երբ այդ ֆոնին մի դրական միտում ես տեսնում, դրա արդյունքը տեսնելու ես 5 տարվա ընթացքում: Նույնը նաև բացասականի դեպքում է: Եթե այդ դրական քայլերը պահպանվեն, ապա 3-5 տարի հետո դրական արդյունք կունենանք, եթե իհարկե, Հայաստանն այս փոթորիկների մեջ դիմանա»:
