«Ազատություն» ռադիոկայանի հայկական ծառայությունը ներկայացրել է Մադրիդում գործող FRIDE վերլուծական կենտրոնի փորձագետների զեկույցը, որտեղ նրանք պնդում են, որ Հայաստանը քիչ հետաքրքիր է Լեհաստանի համար: Նրանք նաև անդրադարձել են Արևելյան գործընկերության ծրագրում Լեհաստանի ունեցած դերակատարությանը:
Եվրոպական քաղաքականության վերլուծությամբ զբաղվող այս հետազոտական կենտրոնի մասնագետները օրերս հրապարակած հատուկ զեկույցում արձանագրում են, որ Լեհաստանը փորձում է համադրել Եվրամիության գլոբալ քաղաքական գիծն իր ազգային շահերի հետ:
«Լեհաստանը չի ցանկանում մնալ Եվրամիության սահմանային պետության դերում և անում է հնարավորը, որպեսզի մի կողմից՝ եվրոպական կառույցների, մյուս կողմից՝ իր արևելյան հարևանների միջև կապերը գնալով ամրապնդվեն»,- արձանագրում են վերուծաբանները՝ նշելով, որ պաշտոնական Վարշավայի համար թիվ մեկ կարևորություն ունեցող պետություններն ավանդաբար Բելառուսն ու Ուկրաինան են: Ինչ վերաբերում է Արևելյան գործընկերության ծրագրի մյուս պետություններին, ապա դրանք, ըստ FRIDE-ի վերլուծաբանների, լեհական արևելյան քաղաքականության համատեքստում երկրորդական նշանակություն ունեն:
Ավելին, փորձագետների պնդմամբ, ամենաթույլ հետաքրքրությունը պաշտոնական Վարշավան տածում է Հայաստանի հանդեպ: «Հետաքրքրվածության նման պակասի պատճառը Երևանի կողմնորոշումն է դեպի Ռուսաստան և Հայաստանի՝ Եվրամիությանն անդամակցելու ուղղությամբ հավակնությունների բացակայությունը,- նշում են մասնագետները՝ նկատելով,- Արևելյան գործընկերության մաս կազմող պետությունների շարքում Հայաստանը վերջինն էր, որտեղ Լեհաստանը դեսպանություն բացեց»:
Փոխարենը, զեկույցի հեղինակների կարծիքով, պաշտոնական Վարշավան ավելի մեծ ուշադրություն է դարձնում Վրաստանին և Ադրբեջանին: Այստեղ Լեհաստանի հիմնական նպատակներից մեկը էներգետիկ անվտանգության ապահովումն է՝ մասնավորաբար Օդեսա-Բրոդի նավթատարի միջոցով կասպիական նավթի արտահանումը դեպի լեհական Պլոցկ քաղաքի նավթամշակման գործարան:
«Վրաստանի հետ կապերը շատ սերտ էին հատկապես Լեհաստանի նախկին նախագահ Կաչինսկու օրոք: Կոմորովսկու պաշտոնավարման շրջանում փոխվեց լեհ – վրացական հարաբերությունների ընդհանուր ոճը, բայց ոչ էությունը»,- նշում են FRIDE-ի մասնագետները՝ հատուկ նկատելով, որ Լեհաստանը և՛ նախկինում, և՛ այսօր շարունակում է աջակցել Վրաստանի անդամակցությանը Եվրոպական Միությանն ու ՆԱՏՕ-ին:
Ընդհանուր առմամբ, FRIDE-ի մասնագետները կանխատեսում են, որ ինչպես Եվրամիությունում նախագահության ամիսներին, այնպես էլ հետագայում պաշտոնական Վարշավան լրջորեն զբաղվելու է իր արևելյան հարևանների խնդիրներով:
«Արևելյան գործընկեության հանդեպ Լեհաստանի հետաքրքրությունը ռազմավարական է և երկարաժամկետ: Վարշավայի ցանկությունը իր արևելյան հարևանների ժողովրդավարացումն է և ինտեգրումը եվրոպական կառույցներին»,- նշում են զեկույցի հեղինակները:
