Հայազգի մասնագետ Միշել Տեր-Զաքարյանը երեկ հեռացավ Ֆրանսիական «Բրեստի» գլխավոր մարզչի պաշտոնից։Նրա հետ միասին ակումբը լքել են նրա օգնականներ Ֆրենկ Ռիսետտոն, Ալեքսանդր Գարիան և Դավիդ Բեկուրան։«Բրեստն» այժմ զբաղեցնում է է Լիգա 1-ի մրցաշարային աղյուսակի վերջին տեղը՝ տասը խաղում տոնելով միայն մեկ հաղթանակ:Նախորդ մրցաշրջանում Տեր-Զաքարյանի գլխավորությամբ «Բրեստը» Ֆրանսիայի առաջնությունում զբաղեցրեց 11-րդ տեղը։ Հայ մասնագետի գլխավորությամբ «Բրեստը» վերջին հանդիպումն անց կացրեց հոկտեմբերի 9-ին սեփական հարկի տակ 1։2 հաշվով զիջելով «Լորյենին»։ Ի դեպ, այդ հանդիպմանը Միշել Տեր-Զաքարյանը հետխաղյա մամուլի ասուլիսին ներկայացել էր հայկական եռագույնով կրծքանշանով։ Նշենք, որ «Լորյենի» դեմ խաղից առաջ արդեն իսկ պարզ էր, որ Տեր-Զաքարյանը հեռանալու է։ Ինչո՞ւ էր հրաժեշտի խաղին և դրան հաջորդած մամուլի ասուլիսին Տեր-Զաքարյանը ներկայացնել հայկական եռագույով զինանշանով։ Արդյո՞ք դա Հայաստանի ազգային հավաքականը գլխավորելու ակնարկ էր։ Հիշեցնենք, որ Ազգերի լիգայի խաղարկության ավարտից օրեր անց ՀՖՖ-ն խզեց պայմանագիրը իսպանացի մասնագետ Խոակին Կապառոսի հետ։
Ներկայում ֆուտբոլի ֆեդերացիան ակտիվ աշխատանք է տանում նոր մարզիչ գտնելու համար։ Ճի՞շտ կլինի արդյոք Հայաստանի ազգային հավաքականի ղեկը վստահել Միշել Տեր-Զաքարյանին։ Վերջինս մարզչական կարիերան 1998-ին սկսել է ֆրանսիական «Մոնպելիեում»՝ 8 տարի աշխատելով երկրորդ, երրորդ թիմերում, 2017-ին գլխավորել էր առաջին թիմը: Մարզչական կարիերայի ընթացքում նա գլխավորել է նաև ֆրանսիական «Նանտը», «Կլերմոնը» և «Ռեյմսը»: Մինչ այդ Տեր-Զաքարյանը, որպես պաշտպան տպավորիչ ելույթով աչքի է ընկել ֆրանսիական մի շարք թիմերում։ Տեր-Զաքարյանը կրել է նաև Հայաստանի ազգային հավաքականի մարզաշապիկը, մեր գլխավոր թիմում 1996-1997 թթ․ անց կացնելով 5 հանդիպում։ Միշել Տեր-Զաքարյանը ծնվել է Երևանում, իսկ կարիերան սկսել է Մարսելի «Vivaux Marronniers Sports» ակումբում։ 1974 թվականին նա միացել է Մարսելի «Մազարգ» ակումբին, որի կազմում նվաճել է միջերկրածովյան խաղերի երիտասարդական լիգայի գավաթը։ Վստահաբար կարող ենք ասել, որ 59-ամյա մասնագետը աշխարհի ուժեղագույն առաջնություններից մեկում աշխատելու մեծ փորձ ունի։ Այո, շատերը կարող են հակադարձել, որ Զաքարյանը մարզչական կարիերայի ընթացքում լուրջ հաջողությունների չի հասել, հավաքականներ չի մարզել, և որ մեզ հարկավոր է ավելի լայն «կալիբրի» մասնագետ։ Իսկ արդյո՞ք այսօր տեսադաշտում կա լայն կալիբրի մարզիչ, որը կհամաձայնվի գլխավորել Հայաստանի հավաքականը։ Գերմանացի հանրահայտ մասնագետ Տոմաս Տուխելն այսօր ազատ է, բայց արդյո՞ք հնարավոր է նման մակարդակի մասնագետի հետ գոնե բանակցություններ սկսել։ Պատասխանը կարծում ենք պարզ է։ Ծանր իրավիճակում գտնվող մեր ազգային թիմին հարկավոր է բանիմաց միևնույն ժամանակ ստրացավ մասնագետ։ «Մեզ հարկավոր են լավ մարզիչ և ֆուտբոլիստներ, որոնք կլինեն լավ մարզավիճակում:
Դա շատ կարևոր է, որովհետև երբեմն մեր լավագույն ֆուտբոլիստները կարող են հավաքական գալ վատ մարզավիճակում, և քանի որ չունենք համարժեք փոխարինող, ստիպված ենք նրան ասպարեզ դուրս բերել: Նույնը եղել է նաև ինձ հետ: Նման իրավիճակում մարզչին էլ չես մեղադրի, որովհետև վատ մարզավիճակում գտնվող այդ ֆուտբոլիստը գուցե ավելի շատ օգուտ տա, քան մեկ ուրիշը: Ինձ համար մարզչի ազգությունն էական չէ, կարևորը սրտացավ լինի մեր հավաքականի համար: Հարկավոր է, որ նա անձնական նպատակ ունենա մեզ հետ աշխատելու համար: Չեմ հավատում, որ որևէ մեկն ուզում է գալ և մեզ համար ինչ-որ լավ բան անել: Միայն մեկ կետ կարող եմ նշել, որ հայը կարող է իր շահը մի կողմ դնել, իսկ արտասահմանցին՝ կասկածում եմ»,- Vnews.am-ին տված հարցազրույցում ասել է Հայաստանի հավաքականի առաջատար ֆուտբոլիստներից Գևորգ Ղազարյանը:
Մեր տեղեկություններով ՀՖՖ-ն ազգային թիմի գլխավոր մարզչի պաշտոնում չի տեսնում տեղացի մասնագետների։ Այս համատեքստում Տեր-Զաքարյանը կարծես իդեալական տարբերակ է։ Այս պահին մեր հայրենակիցն ազատ է, իսկ հավաքականը մարզիչ չունի։ ՀՖՖ-ն պետք է օգտագործի այս հնարավորությունը։ Վստահաբար կարող ենք ասել, որ Տեր-Զաքարայանը միանգամայն համապատասխանում է Գևորգ Ղազարյանի ազգային թիմի մարզչի վերաբերյալ դիտարկումներին։
