1999 թվականի նոյեմբերին՝ հոկտեմբերի 27-ից մի ամիս էլ չանցած, Ռոբերտ Քոչարյանը ստորագրեց մի փաստաթղթի տակ, որն անվանում են Ստամբուլյան խարտիա կամ ԵԱՀԿ-ի 21-րդ դարի սահմանադրություն: Այս մասին այսօր ԱԺ-ում իր ելույթում հայտարարեց «Քաղաքացիական պայմանագիր» խմբակցության պատգամավոր Վահագն Ալեքսանյանը:
«Երեկ Ռոբերտ Քոչարյանի պատգամավորներից մեկը՝ Աննա Գրիգորյանը, իր հարցազրույցներից մեկում ասաց, որ դրանով Ռոբերտ Քոչարյանը ոչ թե ճանաչել է Ղարաբաղն Ադրբեջանի կազմում, այլ ճիշտ հակառակը: Նույնն ասել էր նաև Ռոբերտ Քոչարյանը ամիսներ առաջ»,-ասաց նա և մեջբերեց Ստամբուլյան խարտիայի կամ, ինչպես ընդունված է ասել, ԵԱՀԿ-ի 21-րդ դարի Սահմանադրության 19-րդ կետը, որում մասնավորապես ասվում է, որ մարդու իրավունքների լիակատար հարգումը, ներառյալ ազգային փոքրամասնություններին պատկանող անձանց իրավունքները, հանդիսանալով ինքնանպատակ, չեն կարող խաթարել երկրի տարածքային ամբողջականությունն ու ինքնիշխանությունը:
«Իսկ ի՞նչն է ստիպում Ռոբերտ Քոչարյանին ու իր թիմակիցներին խոսել այն մասին, որ իրականում սրանով ոչ թե ճանաչում են Ղարաբաղը Ադրբեջանի կազմում, այլ հակառակը»,- հարց բարձրացրեց Վահագն Ալեքսանյանը և հավելեց. «Այստեղ գործ ունենք սովորական գավառական շուստրիության հետ, կամ Վանո Սիրադեղյանը կասեր՝ «Թարմ գաղափարներ Ֆիզուլիից»,-ասաց Ալեքսանյանը: