Հայաստանի շուրջ իրադրությունը, կարծում եմ, շարունակում է մնալ բավականին լարված՝ կայուն լարված, բայց պիտի ասեմ նաև, որ ՊՆ հաղորդագրություններից նկատելի է՝ լարվածության թուլացման որոշակի հնարավորություններ կան: Այս մասին, այսօր ԱԺ-ում կառավարության հետ հարցուպատասխանի ժամանակ հայտարարեց վարչապետ Նիկոլ Փաշինյանը։
«Բայց պետք է ընդգծել, որ հնարավորություն տեսնում ենք նաև բանակցային գործընթացի բովանդակությունից ելնելով։ Տեղյակ եք, որ վերջին տասը օրում տեղի են ունեցել մի շարք հանդիպումներ՝ Միրզոյան-Բլինքեն-Բայրամով ֆորմատով, նաև տեղի է ունեցել ԱՄՆ նախագահի անվտանգության գծով խորհրդական Սալիվանի, ՀՀ անվտանգության խորհրդի քարտուղարի և Ադրբեջանի նախագահի օգնականի հանդիպումը: Իհարկե, պարզ է, որ այդ խոսակցությունները պարզ և հեշտ չեն, բայց իմ գնահատմամբ՝ վերջին շրջանի քննարկումներն ու դիվանագիտական աշխատանքը մեր համար առաջ գնալու որոշակի տարածք են ստեղծել ու բացել»,-ասաց նա։
Փաշինյանը նշեց, թե որ ուղղություններով կարող են տարածքներ ի հայտ գալ՝ առաջ շարժվելու համար․ «Ես խոսել եմ 1991թ․ դեկտեմբերի 8-ի համաձայնագրի հիման վրա ՀՀ-ի և Ադրբեջանի կողմից փոխադարձ տարածքային ամբողջականությունը ճանաչելու կոնցեպտի մասին։ Կան նախանշաններ, որ այս հենքը և մոտեցումը կարող են փոխադարձաբար ընդունելի լինել կողմերի համար»,-ասաց Փաշինյանը: