Այսօր Երևանում մեկնարկել է «Գլոբալ նորարարական 5-րդ ֆորում»-ը։ FAST-ի համահիմնադիր Նուբար Աֆեյանը իր ելույթում նշել է, որ մարտահրավերները ստիպում են մեզ մեր մտքերը կենտրոնացնել, ուժերը լարել:
«Մարտահրավերները, որոնք տեսնում ենք որպես պետություն, որը գտնվում է զարգացման փուլում, բազմաթիվ են: Մենք ունենք ոչ համարժեք ռեսուրսներ, թերզարգացած տնտեսություն 30 տարվա ընթացքում, ինստիտուցիոնալ կարողությունների բացակայություն»,-ասել է Աֆեյանը։
Նրա խոսքով՝ մենք ժառանգել ենք շատ բարդ աշխարհագրական տարածք, բայց սա մեր տունն է եղել շատ ավելի վաղ, քան մեր բոլոր հարևանները հայտնվեցին այստեղ։
«Մենք ունենք տարածաշրջանային հսկայական անապահովություն։ Սփյուռքում ապրողներս, երբ լսեցինք Հայաստանի անկախության մասին, երբեք չէինք մտածում, որ այդ անկախությունը երբևէ վտանգի տակ կդրվի։ Եվ հիմա դա ամբողջ սփյուռքում լուրջ մտահոգություն է առաջացրել, և եթե ճիշտ օգտագործենք, այն կարող է դառնալ կառուցողական ուժ»,-հավելեց նա։
