ԵՄ արտաքին գործերի և անվտանգության քաղաքականության գերագույն ներկայացուցիչ Ժոզեպ Բորելը մեղադրել է Ադրբեջանին՝ Հայաստանի ինքնիշխան տարածքի գնդակոծման և օկուպացիայի մեջ: Այս մասին եվրոպական դիվանագիտության ղեկավարը հայտարարել է Ստրասբուրգում՝ Եվրոպական խորհրդարանի լիագումար նիստում:
Իր խոսքում նա ընդգծել է, որ հայ-ադրբեջանական սահմանին վերջին էսկալացիան ոչ թե մարտական գործողություններ են վիճելի շրջանում, այլ ներխուժում Հայաստանի տարածք:
«Ադրբեջանը գնդակոծել և օկուպացրել է հայկական տարածքի մի մասը։ Այն շրջաններում, որոնք գտնվում են Հայաստանում, նրանք օգտագործում են հրետանի և անօդաչու թռչող սարքեր։ Այն, ինչ տեղի է ունենում, չափազանց տխուր է, մոտ 300 զինվոր է զոհվել, 207-ը՝ հայ։ Կան մի քանի գրավված շրջաններ, ինչը բացարձակապես անընդունելի է։ Դա անհարգալից վերաբերմունք է համաշխարհային ճանաչում ունեցող երկրի սահմանների նկատմամբ։ Ուժերն այնքան մոտ են, որ նոր հակամարտության վտանգ կա»,- հայտարարել է Բորելը։
Նա նաև հայտնել է, որ ԵՄ-ն դիմել է Ադրբեջանին՝ կոչ անելով հետաքննություն անցկացնել հայ ռազմագերիների սպանության հետ կապված տեսապատկերների վերաբերյալ:
Միևնույն ժամանակ նա պաշտպանել է Ադրբեջանի հետ ԵՄ-ի ձեռք բերած էներգետիկ համաձայնագիրը՝ հայտարարելով, որ «համաձայնագիրը չի աշխատում ի վնաս մարդու իրավունքների կամ այլ ժողովրդավարական հարցերի, որոնք ծագել են երկրում»: