Նախօրեին տելեգրամյան ալիքներում տարածված տեսանյութը, որտեղ ադրբեջանական ստորաբաժանումները վայրագորեն գնդակահարում են գերի ընկած հայ զինծառայողներին, հանրության շրջանում թողել է շոկային տպավորություն: Պաշտոնական Երևանը թե վարչապետի, թե արտգործնախարարի մակարդակով հայտարարել է, որ միջազգային հանրությունը պետք է հստակ դատապարտի տեղի ունեցածը և կատարի անհրաժեշտ քայլերը, որոնք բխում են այդօրինակ անմարդկային գործողություններից, փաստացի՝ պատերազմական հանցագործությունից: Եվրամիության հատուկ ներկայացուցիչ Տոյվո Կլաարը ասել է, թե «եթե հաստատվի տեսանյութի իսկությունը», ապա այն պետք է ունենա հետևանք: Քանի՞ ամիս կամ տարի կտևի «տեսանյութի իսկությունը» հաստատելը, դեռ կերևա:
Մինչ այդ, վայրագություն իրականացրած զինծառայողների Գերագույն գլխավոր հրամանատար Իլհամ Ալիևը հոկտեմբերի 1-ին մասնակցել է Հունաստան-Բուլղարիա միջհամակարգային գազատարի բացմանը, որով Բուլղարիան կստանա նաև ավելի շատ ադրբեջանական գազ: Վայրագ տեսանյութը Եվրոպան դրել է հերթական «փորձության» առաջ՝ ադրբեջանական գազի ու եվրոպական արժեքների «միջև»: «Ֆրանսիական լրատվամիջոցներ և ԵՄ, ինչի՞ եք սպասում, որ ինչ-որ բան անեք փոքր և ժողովրդավար Հայաստանի համար։ Տիկին ֆոն դեր Լեյեն, սպասո՞ւմ եք, որ ադրբեջանցիներն ու նրանց թուրք դաշնակիցներն ավարտին հասցնեն 1915 թվականի ցեղասպանությունը։ Արդյո՞ք հայկական արյունն ավելի էժան է, քան ուկրաինացիները», գրել է ֆրանսիացի քաղաքական գործիչ, պատգամավոր Վալերի Բուայեն իր թվիթերյան էջում՝ քննադատելով տեղի ունեցողի հանդեպ ֆրանսիական ԶԼՄ-ների ու եվրոպական կառույցների դիրքորոշումը: Հայաստանի նախկին արտգործնախարար Զոհրաբ Մնացականյանը, անդրադառնալով տեսանյութին, նշել է, որ դա հարված է խաղաղության հասնելու ԵՄ ու ԱՄՆ փորձերին. «Ադրբեջանցի ագրեսորների կողմից հայ զինծառայողների գնդակահարության ահասարսուռ կադրերը հարված են ԱՄՆ-ի ու ԵՄ-ի` խաղաղության հասնելու ջանքերին:
Մենք գործ ունենք վայրենիների հետ: Ոչ մի առաջխաղացում չի կարելի ակնկալել` առանց ադրբեջանցիների նկատմամբ գործողությունների: Պատժամիջոցներ, զինամթերք ու դեօկուպացիա: Հիմա»: Գործնականում շատ բարդ է վիճել այդ իրողության հետ: Ադրբեջանը «հիանալի» օգտվում է Արևմուտք-Ռուսաստան դիմակայությունից և աներկբա է, որ Ադրբեջանին խաղաղության դաշտ բերելու միակ հնարավորությունը այդ երկրին ագրեսիվ քաղաքականության և ռազմատենչության հետևանքին առերեսելու կամքն է, որ կարող է դրսևորել այսպես ասած քաղաքակիրթ աշխարհը: Առայժմ «քաղաքակիրթ աշխարհը» դրսևորում է Բաքվի հետ տնտեսա-քաղաքական առևտրի կամք, այդ հանգամանքը ծառայեցնելով իր համար այսօր առավել գերակա խնդրի՝ Ռուսաստանի հետ դիմակայության և ուկրաինական պատերազմի: Դա իհարկե այսպես ասած միջազգային հանրության իրավունքն է և շահը, պարզապես անհրաժեշտ է հասկանալ, թե որ ուղղությամբ որտեղ է սկսում, որտեղ ավարտվում և որտեղ է զոհաբերվում մեր՝ հայկական շահն ու անվտանգությունը, որպեսզի կարողանանք աշխատել իրապես արդյունավետ: Այդ ամենով հանդերձ, տեղ ունեցածում ուշադրության է արժանի և այն, որ տեսանյութը կարծես թե լայն հանրային ուշադրության դաշտ է գալիս այն օրը, երբ Ժնևում տեղի է ունենում Միրզոյան-Բարյամով հանդիպում, որտեղ ըստ Հայաստանի վարչապետի ասուլիսում հնչեցրած մտքի՝ պետք է մեկնարկեր առարկայական քննարկումը Հայաստան-Ադրբեջան խաղաղության պայմանագրի շուրջ: Տարածված տեսանյութն ու աղմուկը այդ հարցում խանգարե՞լ է, թե՞ նպաստել Բաքվի դիրքորոշումների զսպմանն ու կառավարմանը: