ՀՀ արդարադատության նախարարի տեղակալ Արփինե Սարգսյանը Ներքին գործերի նախարարության ստեղծմանն ընդառաջ անցումային և հետագա փուլերի կարգավորմանը նվիրված հանդիպմանը նշել է, որ նախարարության պատշաճ կազմավորման համար անհրաժեշտ է փուլային սկզբունքով վեր հանել և գնահատել այն հիմնահարցերը, որոնք նախարարության ձևավորման և հետագա գործունեության փուլերում լուծում են պահանջում:
Ինչպես տեղեկացրին ՀՀ արդարադատության նախարարությունից, Սարգսյանը շեշտել է, որ նախարարության գործունեությանն առնչվող հարցերի մեծ մասը գործառնական տիրույթում են, բայցև պահանջում են մանրակրկիտ քննարկում և լուծումների նախանշում, որոնք հետագա փուլերում թույլ կտան պահպանել բարեփոխումների տրամաբանությունը:
Ըստ աղբյուրի՝ փոխնախարար Սարգսյանը նշել է, որ այս հանդիպմամբ տրվում է փորձագիտական քննարկումների շարքի մեկնարկը, որի շրջանակներում առանձնացվելու են նախարարությանն առնչվող թիրախային հարցեր: Սա թույլ է տալու օրենսդրական զարգացումներին զուգահեռ ունենալ նաև նախարարության կազմավորման գործնական պատկերի տեսլականը:
«ԵԱՀԿ «Անվտանգության ոլորտի կառավարման ամրապնդումը Հայաստանում» ծրագրի համակարգող Ռուզաննա Բաղդասարյանն իր հերթին վերահաստատել է ԵԱՀԿ պատրաստակամությունը Ներքին գործերի նախարարության ստեղծման շրջանակներում փորձագիտական աջակցություն տրամադրելու հարցում:
Հանդիպման շրջանակներում ծավալվել է ակտիվ քննարկում ԵԱՀԿ աջակցությամբ Հայաստան ժամանած էստոնացի փորձագետ Լաուրի Տաբուրի մասնակցությամբ, դիտարկվել են Ներքին գործերի նախարարության քաղաքականության մշակման գործառույթին, անձնակազմի կառավարմանը և ռեսուրսների բաշխմանն առնչվող մի շարք հարցեր:
Հանդիպմանը մասնակցել են Արտակարգ իրավիճակների նախարարության, Ոստիկանության, Միգրացիայի ծառայության, Եվրոպական Միության, ԱՄՆ դեսպանատան ԹՊԻՀ գրասենյակի, ԻՍԻԹԱՓ-ի և քաղաքացիական հասարակության ներկայացուցիչները»,- ասվում է հաղորդագրության մեջ:
Նշվում է, որ հանդիպումը կազմակերպվել է Արդարադատության նախարարության կողմից՝ ԵԱՀԿ «Անվտանգության ոլորտի կառավարման ամրապնդումը Հայաստանում» ծրագրի հետ համատեղ:
