«Առաջին լրատվական»-ի հարցերին պատասխանել է Արցախի Ազգային ժողովի «Ազատ հայրենիք-ՔԴՄ» խմբակցության ղեկավար Արթուր Հարությունյանը
-Պարոն Հարությունյան, Ռոբերտ Քոչարյանը օրերս ասուլիսում անդրադարձել էր Արցախի խնդրին՝ նշելով, որ Արցախի խնդրի կարգավորման հետ կապված կա լուռ համաձայնություն, նաև քննադատում էր Արցախի իշխանություններին՝ մեղադրելով, որ նրանք կարծես հարմարվել են այս վիճակի հետ: Ինչպե՞ս եք սա գնահատում:
-Ես չգիտեմ՝ Քոչարյանն ինչ է ասում, ինչի մասին է խոսում, բայց մենք մեր տեսակետները բազմիցս ներկայացրել ենք, որ սա ինքնորոշման հարց է: Մենք 1991 թվականին արտահայտել ենք մեր հավաքական դիրքորոշումը և պայքարը շարունակել ենք մինչև էսօր, շարունակում ենք մեր ինքնորոշման իրավունքի ճանապարհով գնալ: Եթ խոսքը այլ համատեքստի մասին է, ապա ոչինչ չեմ կարող ասել, որովհետև ինքս չեմ լսել, թե ինչի մասին է ինքը խոսում: Մեր դիրքորոշումը չի փոխվել ու չի փոխվելու: Արցախի նախագահի վերջին ուղերձը դուք լսել եք, այնտեղ ամեն ինչ մանրամասն ներկայացված է: Հիմա մի գործիչ մի բան է մեկնաբանում, մի ուրիշ՝ մեկ այլ բան:
-Բայց Ձեր նշած մեկ ուրիշը Արցախի նախկին նախագահ է եղել:
-Դրա համար էլ ասում եմ, որ ես իրենց տեղը չեմ կարող ասել, թե իրենք ինչ նկատի ունեն: Արցախի Հանրապետության նախագահը իր ուղերձում ամեն ինչ ներկայացրել է և դրանով ամեն ինչ ասված է: Մնացած ենթադրությունների, մեկնաբանությունների դաշտից է, որը ես չեմ ուզում մեկնաբանել:
-Քոչարյանն ասում է, որ եթե ամեն բան այսպես շարունակվի, բանակցային գործընթացը լինելու Բաքու, Ստեփանակերտ և ինչ-որ չափով մոսկվա ֆորմատով:
-Մինսկի խումբը կա, միջազգայնորեն ճանաչված ձևաչափ է, ոչ մեկը այդ ձևաչափը չի լուծարել և չի էլ պատրաստվում լուծարել: Այնտեղ կան հայտնի երեք սկզբունքները և դրանց հիման վրա բանակցային գործընթացը պետք է շարունակվի: Այս պահին ժամանակավոր աշխարհաքաղաքական ստեղծված իրավիճակի պայմաններում կարող է աշխատանքը հենց այդպես չի կատարվում կամ համանախագահները առանձին-առանձին են տարբեր հայտարարություններ անում, բայց բանակցային գործընթացի ձևաչափը որևէ փոփոխության չի ենթարկվել, և իմ տեղեկություններով, չի էլ նախատեսվում փոփոխություն:
-Քոչարյանը նաև հայտարարել է, որ Արցախի իշխանությունը ինչ-որ տեղ հարմարվել է այս վիճակի հետ և որպես ինքնաարդարացում ասում են՝ հիմա ի՞նչ անենք, Հայաստանը ձեռքերը լվացել է, մի ելք պիտի գտնենք՝ ժողովրդին այստեղ պահելու համար, և դա հնարավոր չէ անել առան Ադրբեջանի հետ համագործակցության։ «Վերջերս նաև Ղարաբաղի իշխանությունը նաև դա անում է բավական մեծ ջանասիրությամբ։ Կախվածությունը Բաքվից այս ընթացքում միայն մեծացել է»,-ասել է նա:
-Արցախի նախագահի ուղերձում նաև դրա մասին հատուկ շեշտադրում կա: Ադրբեջանի հետ բոլոր շփումները, քննարկումները, որոնք տեղի են ունենում, տեղի են ունենում ենթակառուցվածքների, կոմունիկացիաների հարցերի շուրջ: Քաղաքական որևէ քննարկում տեղի չի ունենում: Այսինքն՝ քննարկվում են մեր ենթակառուցվածքների, ջրային ռեսուրսների, էլեկտրաէներգիայի, կապի և այլ խնդիրները: Դա ոչ մեկը չի էլ հերքում, բայց դրանք քաղաքական քննարկում չեն:
-Այսինքն՝ համաձա՞յն չեք Քոչարյանի այս դիտարկումների, քննադատությունների հետ:
-Ես չգիտեմ՝ դրա տակ ինչ է հասկացվում, ես մեր տեսակետը ներկայացրեցի, որ այստեղ չկա որևէ քաղաքական շփում, կա ենթակառուցվածքների մասով փոխհամաձայնեցված աշխատանք, որը փոխշահավետ է:
-Դուք ինչպե՞ս եք գնահատում Վեհափառի նախաձեռնությամբ նախկին նախագահների հետ հանդիպումը:
-Շատ լավ եմ գնահատում, բայց առաջին նախագահի տեսակետներին բացարձակ կողմ չեմ և չեմ ընդունում: Իր տեսակետները, որ մենք պետք է պարտվողական կեցվածք ընդունենք, ինձ համար ընդունելի չէ: Այն, ինչ ինքն անում էր 1994 թվականից հետո, հիմա ինքը փորձում է շարունակել այդ թեզը և փորձում է բոլորին ապացուցել, որ տեսեք, ես ճիշտ էի: Բայց այդպես չէ, դա պարտվողական կեցվածք է, և ես բացարձակ դեմ եմ իր հարցազրույցում ներկայացրած թեզերին: