Թբիլիսիում շտապօգնության ծառայության բժիշկներն ու վարորդները բողոքի ակցիա են անցկացրել՝ պահանջելով բարձրացնել աշխատավարձերը։
Արտակարգ իրավիճակների համակարգման կենտրոնի աշխատակիցները սկսում են նախապատրաստվել համընդհանուր գործադուլի: Այդ նպատակով նրանք արդեն դիմել են դատարան։ Շտապ բժշկական օգնության ծառայության աշխատակիցների բողոքի ակցիաները սկսվել են մայիսին՝ այն բանից հետո, երբ առողջապահության նախարարությունը նրանց զրկեց հավելավճարներից, որոնք կորոնավիրուսի համաճարակի ժամանակ տրվում էին ծանրաբեռնված կանչերի ու աշխատանքային գրաֆիկի համար:
Գարնանը արտակարգ իրավիճակների համակարգման կենտրոնում հայտարարել են, որ աշխատակիցների հետ պայմանավորվածություն են ձեռք բերել 192-ից մինչև 156 աշխատանքային ժամերի կրճատման վերաբերյալ: Ընդ որում, առողջապահության նախարարությունում խոստացել են, որ շտապօգնության աշխատակիցների աշխատավարձը կլինի նույնը՝ 1200-2000 լարի: