Արցախյան 44-օրյա պատերազմի 2-րդ տարելիցի օրը, Հայ Առաքելական եկեղեցու Գեղարքունյաց թեմի Գավառի առաջնորդանիստ Սուրբ Աստվածածին եկեղեցու բակում մատուցվեց հոգեհանգստյան կարգ՝ ի հիշատակ այդ պատերազմում հայրենիքի համար իրենց կյանքը զոհաբերած քաջորդիների։ Արարողությանը ներկա էին Գեղարքունիքի մարզպետ Կարեն Սարգսյանը, Գավառ համայնքի ղեկավար Գուրգեն Մարտիրոսյանը, Գեղարքունիքի մարզպետարանի եւ Գավառի համայնքապետարանի, մարզի ուժային կառույցների, կրթամշակութային հաստատությունների ներկայացուցիչներ, անհատ քաղաքացիներ։ Արարողության մասնակիցները ծաղիկներ խոնարհեցին եկեղեցու բակում տեղադրված եւ արցախյան 44-օրյա պատերազմի զոհերի հիշատակը հավերժացնող խաչքարին։
Հոգեհանգստի կարգը մատուցվեց Գեղարքունյաց թեմի հոգեւոր դասի մասնակցությամբ։
Արարողության մասնակիցներն աղոթք բարձրացրին առ Աստված՝ հերոս տղաների հոգիների խաղաղության համար։ Այնուհետ Գավառի Սուրբ Աստվածածին եկեղեցում կատարվեց նաեւ խնկարկություն եւ մոմավառություն։
