Ամենայն հավանականությամբ մենք տարին երկնիշ տնտեսական աճով կամփոփենք, «Առաջին լրատվական»-ի հետ զրույցում նշեց ԵՊՀ կառավարման և գործարարության ամբիոնի վարիչ, տնտեսագետ Կառլեն Խաչատրյանը:
«Բայց այստեղ պետք է ըւնդունենք, որ այդ աճը առավելապես արտաքին գործոններով է պայմանավորված, այստեղ էական դեր է խաղացել ռուս-ուկրաինական պատերազմը և դրա արդյունքում Հայաստան եկած աննախադեպ մեծ թվով օտարերկրյա քաղաքացիները: Նրանց մի մասը որպես զբոսաշրջիկ է եկել, մի մասը ժամանակավոր բնակություն է հաստատել, մի հատված էլ կա, որ բիզնես նպատակներով է եկել, այսինքն փորձել է իր բիզնեսը կամ բիզնես գործունեության մի մասը տեղափոխել Հայաստան: Արդյունքում ունենք ծառայությունների ոլորտի մոտ 27 տոկոսանոց աճ, որը փաստացի, հենց հիմնական լոկոմոտիվն է եղել 13,9 տոկոսանոց աճն արձանագրելու:
Օրինակ, արդյունաբերության ոլորտում 9 տոկոսանոց աճը երեք անգամ ցածր է, քան ծառայությունների ոլորտի աճը: Շինարարության ոլորտի 14,2 տոկոսանոց աճն էլ առավելապես պետք է պայմանավորել հիփոթեքային վարկի տոկոսները եկամատային հարկից հետ վերադարձի օրենքի ժամկետների փոփոխությամբ»,-ասաց նա:
