Առողջապահության նախարար Անահիտ Ավանեսյանն այսօր հանրապետության բժշկական հաստատությունների ղեկավար կազմի հետ քննարկել է առողջապահական համակարգի ընթացիկ բարեփոխումները, առաջիկա ծրագրերն ու խնդիրները։ Նախարարը ներկայացրել է ապահովագրական համակարգի ներդրման հայեցակարգային քննարկումների ընթացքը, անդրադարձել պետպատվերի շրջանակներում հատկացվելիք բյուջետային միջոցների բաշխմանը, բուժաշխատողների ՇՄԶ կրեդիտավորմանը։
Թե‘ առողջապահության նախարարի, և թե‘ բուժկենտրոնների պատասխանատուների կողմից կարևորվել է, որ 2023 թվականին պետպատվերի բաշխման գործընթացը ուղեկցվի հաշվետվողականության բարձրացմանն ուղղված խրախուսիչ միջոցառումներով՝ ամբուլատոր-պոլիկլինիկական օղակի բոնուսային վարձատրության ավելացում, Արմեդ մուտքագրվող տեղեկատվության ամբողջության ապահովում, հերթագրման ավտոմատացում և վճարովի ծառայությունների մուտքագրում Արմեդ համակարգ։
Առողջապահության նախարարը շնորհակալություն է հայտնել բուժկենտրոնների ղեկավարներին համագործակցության և գործադրած ջանքերի համար` թե՛ ճգնաժամային իրավիճակներում, թե՛ ընթացիկ ծրագրերում։