Սեպտեմբերի 25-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում «Նագգաշյան մանուկների տուն» երեխաների աջակցության կենտրոնի 10-ամյակի առիթով հյուրընկալել է կենտրոնի բարերարներին, մանկավարժներին, սաներին և շրջանավարտներին: «Նագգաշյան մանուկների տուն» երեխաների աջակցության կենտրոնը գործում է Երևանում Մայր Աթոռի հովանու ներքո: Այս մասին հայտնում է Մայր Աթոռի տեղեկատվական համակարգը։
Հայցելով Ամենայն Հայոց Կաթողիկոսի օրհնությունը՝ տնօրեն Նունե Գեղամյանն անդրադարձ է կատարել կենտրոնի 10-ամյա գործունեությանն ու ձեռքբերումներին: Տիկին Գեղամյանն ընդգծել է նաև, որ կենտրոնն այսօր արդյունավետորեն համագործակցում է տարբեր պետական պատկան կառույցների ու հասարակական կազմակերպությունների հետ:
Ամենայն Հայոց Հայրապետը, իր հայրական օրհնությունը փոխանցելով ներկաներին, կարևորել է կենտրոնի առաքելությունը և ընդգծել, որ այն նաև լավագույն հնարավորությունն է ընձեռում հայորդիներին առավել հաղորդ դառնալու Առաքելական Սուրբ Եկեղեցու հոգևոր արժեքներին։ Այս առիթով Նորին Սրբությունը հույս է հայտնել, որ կենտրոնի սաները, հաղորդակցվելով սուրբ հայրերի ժառանգությանը, իրենց բարի պտուղները կբերեն ի նպաստ հայոց աշխարհի շենացման ու զորացման:
Հանդիպմանը Հայոց Հովվապետն իր գնահատանքն է հայտնել կենտրոնի տնօրինությանը և մանկավարժներին իրենց նախանձախնդիր ու նվիրյալ աշխատանքի, ինչպես նաև վարքային խնդիրներ ու խնամքի կարիք ունեցող երեխաներին ըստ ամենայնի աջակցելու համար:
Խոսելով կենտրոնի ստեղծման պատմության մասին՝ Վեհափառ Հայրապետն իր մասնավոր գնահատանքն է բերել բարերարներին, որոնց հոգածությամբ կյանքի է կոչվել և իր առաքելությունն է շարունակում իրականացնել «Նագգաշյան մանուկների տուն»-ը։
Անդրադարձ է կատարվել նաև կենտրոնն ավարտած սաների հետագա կյանքի ընթացքի կազմակերպման ուղիներին: