«Առաջին լրատվական»-ի զրուցակիցն է ԳԽ պատգամավոր Ազատ Արշակյանը
-Պարոն Արշակյան, այսօր ՀՀ ԱԳ նախարարության մուտքի մոտ մի շարք քաղաքական և հասարակական ուժերի ներկայացուցիչներ կազմակերպում են հավաք՝ Հայաստանի անդամակցությունը ՀԱՊԿ–ում դադարեցնելու պահանջով: Հաշվի առնելով, որ իշխանության ներկայացուցիչները վերջին շրջանում անթաքույց իրենց դժգոհություններն են հայտնում ՀԱՊԿ-ից, ի՞նչ եք կարծում, ստեղծվե՞լ է նախադրյալ ՀԱՊԿ-ից դուրս գալու:
-ՀԱՊԿ-ն ինքն է իրեն դուրս թողել Հայաստանի անվտանգության համակարգից: Զբաղեցնելով անվտանգության համակարգի դիրքապահի տեղը՝ դասալիք է եղել: Տվյալ դեպքում մենք գործ ունենք դասալիք կազմակերպության հետ: Եվ եթե մեր իշխանությունը կողմ է դասալիքի հետ խորացնել իր հարաբերությունները, ուրեմն ինքն էլ է դասալիք: ՀՀ-ն այլ անվտանգության համակարգ պետք է ստեղծի: Ովքեր են դասալիք՝ ՀԱՊԿ-ը, ՌԴ ԶՈւ-ն և երրորդ՝ Հայաստանի խորհրդարանական ընդդիմությունը:
Եվ հիմա մենք գնում ենք կառավարության շենքի մոտ՝ իմանալու՝ կառավարությունն ում կողմից է: Կառավարությունը միանում է դասալիք ընդդիմությա՞նը, դասալիք ՌԴ-ի՞ն, դասալիք ՀԱՊԿ-ի՞ն, թե՞ միանում է ՀՀ քաղաքացիներին և պետության շահերին: Դրա համար է այս հանրահավաքը: Մենք ՀՀ անվտանգության կողմնակից ենք, հիմա պետք է պարզենք՝ ում կողմից է իշխանությունը: Իշխանությունը պետք է դուրս գա պատշգամբ և հայտարարի՝ դասալիքների՞ հետ է, թե ՀՀ քաղաքացիների:
–Իշխանությունն արդյոք իր գործողություններով և հայտարարություններով ցույց է տալի՞ս, որ կողմ է ՀԱՊԿ-ից դուրս գալուն:
-Թավշյա հայտարարություններով ասել է, որ «դարպասապահը» լքել է: Եվ մենք կարող ենք ասել, որ ինքը գիտի՝ մենք ինչի համար ենք հավաքվում ԱԳՆ շենքի մոտ: Մենք իրեն տեղյակ ենք պահում, որ Հայաստանը ռիսկային զոնա է մտել և տվյալ դեպքում անպաշտպանության պատասխանատվությունն իշխանությունը վերցնում է իր վրա, թե ոչ: Նա չի կարող ասել, որ անտեղյակ ենք եղել, մենք ասում ենք, որ «դարպասապահը» լքել է իր «պոստը»:
–Նշվում է, որ ՀԱՊԿ-ից դուրս գալը իսկապես երկարատև գործընթաց է ենթադրում:
–Երկար է թե ոչ, պետք է դա անել, իսկ ի՞նչ, սպասենք դարպասները բաց թողնենք, թե դարպասները հարկավոր է փակենք: Փակել է պետք դարպասները, և հենց այսօր դա հարկարավոր է դա անել:
–ԱՄՆ-ն պատրաստ է լինե՞լ այդ անվտանգության երաշխավորը:
-Միացյալ Նահանգները, Կոնգրեսը, կառավարությունը, նախագահը, հայտարարում են, որ պատրաստ ենք ապահովել ձեր անվտանգությունը: Բացի դրանից, նրանք ասում են, որ մենք հիմա էլ ենք դա ապահովում: Մինսկի խումբն իր Միացյալ Նահանգների և Ֆրանսիայի համանախագահներով հայտարարում է, որ մեր կողմից են, որ կփակեն հակառակորդի ճանապարհը: Պետք է դարպասը փակենք, և քրեաօլիգարխիկ ինտերնացիոնալը իմանա, որ մեր կողքին կանգնած է առաջադիմական աշխարհը: Նրանք հայտարարում են, որ դուք ձեզ պաշտպանեք, մենք էլ ձեզ կպաշտպանենք: ԱՄՆ իշխանությունների հայտարարությունները, ինչպես նաև ԵՄ հայտարարությունները նրանց մասին են, որ մենք մենակ չենք մնա: Էլ ի՞նչ եք ուզում, 3,5 միլիարդ մարդ դա ասում է: Ականջ ունեցողը կլսի: