Այսօր տեղական ինքնակառավարման մարմինների համամասնական ընտրակարգով հերթական ընտրություններ են անցկացվում Արագածոտնի, Գեղարքունիքի, Լոռու, Կոտայքի, Շիրակի, Սյունիքի, Վայոց ձորի և Տավուշի մարզերի 17 համայնքում, իսկ Արագածոտնի մարզի Ալագյազ համայնքում անցկացվում են մեծամասնական ընտրակարգով հերթական ընտրություններ: Նշված համայնքում ընթանում են համայնքի ղեկավարի և ավագանու անդամների ընտրություններ: Տեղական ինքնակառավարման մարմինների ընտրություններն անցկացնելու համար կազմավորվել են ընդհանուր թվով 314 տեղամասեր:
ԿԸՀ նախագահ Տիգրան Մուկուչյանը «Առաջին լրատվական»-ի հետ զրույցում նշեց, որ քվեարկության մասնակիցների առաջին թիվը կհավաքի ժամը 11:00-ին և մինչև 12:00-ն կհրապարակի: Կենտոնական ընտրական հանձնաժողովի նախագահը նաև նշեց, որ այս պահին որևէ ահազանգ չկա, ամեն բան նորմալ ընթանում է:
Իր հերթին «Անկախ դիտորդ» հասարակական դաշինքը հետևում է քվեարկության ընթացքին դիտորդների 49 շրջիկ խմբերով: Այս պահին հետևյալ արձանագրումներն են. Սիսիանի 34/06 ընտրատեղամասում հանձնաժողովի նախագահը դիտորդներին չի թույլատրում ուսումնասիրել գրանցամատյանը, բոլոր հորդորներին պատասխանում է «ձեր գործը չի», «դուրս եկեք տարածքից» արտահայտություններով:
Բացի դա, ընտրատեղամասում են գտնվում վկայականներ չկրող անձինք: Փաստացի, հանձնաժողովի նախագահը չի տիրապետում իրավիճակին և չգիտի իր լիազորություններն ու պարտականությունները:Քաջարանի 35/01 ընտրատեղամասում դիտորդներին թույլ չեն տվել մուտք գործել ընտրատեղամաս: Հանձնաժողովի նախագահը պատճառաբանել է, թե չի թույլատրվում նույն առաքելությունից երկու դիտորդների ներկայությունը ընտրատեղամասում:
Սիսիանի 34/02 ընտրատեղամասում ոստիկանը հրաժարվել է արձագանքել տարածքում մարդկանց կուտակումների վերաբերյալ դիտորդների ահազանգին՝ պատճառաբանելով, թե ընտրատեղամասի մոտ թույլատրվում է մինչև 15 հոգու ներկա գտնվելը:
