Իրանում չեն դադարում բողոքի ցույցերը: Ըստ տեղեկությունների՝ մեծապես երկրի ադրբեջանաբնակ հատվածներում են տեղի ունենում ցույցեր, որոնք սկսվել էին 22-ամյա Մահսա Ամինիի՝ կալանավայրում մահանալուց հետո։ Հիշեցնենք, որ Մահսա Ամինին ձերբակալվել էր գլխաշորը ոչ պատշաճ կրելու համար։ Որքանո՞վ կարող են դրսից, մասնավորապես Ադրբեջանից հրահրված լինեն այս ցույցերը։
Այս առնչությամբ, իրանագետ, ՄԱՀՀԻ ասոցացված փորձագետ Էմմա Բեգիջանյանը «Առաջին լրատվական»-ի հետ զրույցում նշեց ցույցերն ամբողջ երկրով մեկ են տարածված, ոչ միայն ադրբեջանակաբնակ հատվածներում. «Այդ աղջիկը քուրդ էր, Իրանի Քրդստանի նահանգից եկել էր Թեհրան: Հատուկ դասընթացներ կան, որտեղ տանում են նրանց, որոնք հիջաբ կրելու կանոններին չեն հետևում: Դրա համար հատուկ ոստիկանություն կա դրա համար: Այդ ոստիկանությունը նրա ձերբակալել է, ըստ երևույթին, նրան հարվածել են, որի հետևանքով աղջիկն ընկել է կոմայի մեջ, ապա մահացել: Բայց քանի որ Իրանի Արևմտյան Ադրբեջանի նահանգում խառը բնակվում են քրդեր ու ադրբեջանցիներ, այդ նահանգի քաղաքներում ցուցարարներն ավելի շատ են: Այսինքն՝ դրանք քրդաբնակ քաղաքներ են, շրջաններ են, որոնք այդ նահանգի մեջ են մտնում:
Ինչ վերաբերում է դրսից հրահրելուն, ապա դրսի ընդդիմությունը, իրենց կայքերով, հեռուստատեսություններով լայնորեն լուսաբանում են այդ դեպքերը: Հիմնականում սա է իրավիճակը: Հիմա ցուցարարները պահանջում են վերացնել այդ օրենքը, որով հատուկ ոստիկանությունը հետևում է հիջաբներ կրելուն: Այս պահին ցույցերը շարունակվում են: Խոսում են, որ շուրջ 200 քաղաքներում տարածվել են ցույցերը: Ոստիկանությունը արցունքաբեր գազ ու ջրցան մեքենաներ է կիրառել, նաև կրակել են, որից 30 մարդ մահացել է»,-ասաց Բեգիջանյանը:
Նա բացառեց այս զարգացումներում Ադրբեջանի կողմից հրահրված լինելու գործոնը. «Ճիշտ է, Թավիզում եղել են ցույցեր, բայց Արևմտյան Ադրբեջանի նահանգի այն քաղաքներում, որոնք քրդաբնակ չեն, ավելի քիչ են եղել ցույցերը: Իհարկե, և ադրբեջանցիները, և թուրքերը հիմա ուրախությունից փայլում են, բայց ես բացառում եմ, որ սա կապ ունի իրենց հետ: Հիմնականում կանայք են բողոքի դուրս եկել»:
Հարցին՝ արդյոք Իրան-Ադրբեջան հարաբերություններում լարվածություն նկատվում է, հատկապես Իրանի կողմից հնչող հայտարարություններից հետո, որտեղ նշում են, որ սահմանների փոփոխություն Իրանը թույլ չի տալու, իրանագետը պատասխանեց. «Իհարկե, կա լարվածություն: Նախևառաջ, Իրանը շատ հասցեական դիմում է Էրդողանին այդ հարցով: Մասնավորապես, Շանհայի համագործակցության կազմակերպության գագաթնաժողովում Էրդողանի հետ հանդիպմանը Իրանի նախագահը հստակ այդ մասին ասաց: Նաև ասաց այն ժամանակ, երբ Էրդողանը ՇՀԿ-ում հայտարարեց, թե այդ միջանցքը շատ մեծ դրական նշանակություն կունենա միջազգային տնտեսության համար: Երկու դեպքում Իրանը շատ հասցեական ասաց, նույն կերպ ասվել է նաև Ալիևին, որպես Էրդողանի կամակատար»:
