Սեպտեմբերի 22-ին Գարեգին Բ-ն հանդիպում է ունեցել Հայաստանի ու Արցախի նախկին նախագահների հետ, և արդեն տեսակետ է հնչում, որ Էջմիածնից կարծես հեղաշրջման նախապատրաստության և իշխանազավթման հոտ է գալիս, ինչը մեծ վտանգով է հղի:
Այս առնչությամբ, Քրիստոնեա-ժողովրդավարական կուսակցության ղեկավար Լևոն Շիրինյանը «Առաջին լրատվական»-ի հետ զրույցում նշեց, որ այդ ամենը բլեֆ է. «Իրենք զբաղված են Ռուսաստանի շահերի սպասարկմամբ և իրենց գործունեության քողարկմամբ, որովհետև ենթադրում եմ, որ սրանք Ռուսաստանի հետ այնպիսի պայմանավորվածություններ ունեն, որ որոշել են Ռուսաստանի մեռնելուց առաջ Հայաստանի հարցը լուծեն: Սա դավադրություն է, ուրիշ բան չի կարող լինել: Ես մի հարց եմ տալիս. այդ նախկին երեք նախագահներին գումարած Ղարաբաղի նախկին երկու նախագահները, իրենք ո՞վ են ընդհանրապես: Իրենք ի՞նչ իրավունքով են անտեսում ժողովրդի ընտրության արդյունքները: Ի՞նչ է իրենց ուզածը, երևի որոշել են մինչև Ռուսաստանի կործանումը Հայաստանի բոլոր շահերի հանձնեն, վերջացնեն: Ընդ որում ՀՀ վարչապետը երկրում չէ, ԱԳ նախարարը երկրում չէ, ԱԽ քարտուղարն երկրում չէ, ու մենք տեսնում ենք, թե Հայաստանի շահերի պաշտպանության ինչպիսի դաժան ու սկզբունքային պայքար է գնում դրսում: Եվ այդ ֆոնին սրանք էստեղ դավեր են նյութում: Իրենց պետք է առաջարկել Հայաստանից դուրս գնալ, քանի որ իրենք հայ ժողովրդի շահերի հետ ոչ մի ընդհանուր բան չունեն: 44-օրյա պատերազմը և իրենց կատաղի թշնամանքը ընտրություններով ձևավորված իշխանության և ժողովրդի շահերի դեմ ապացուցում է, որ սրանք պայմանավորվածություն են ունեցել Հայաստանը ծառայեցնել Ռուսաստանի ու Ադրբեջանի շահերին՝ հայ ժողովրդի տարածքի ու արյան հաշվին»,-ասաց նա:
Ինչ վերաբերում է տեսակետին, թե նրանք շահագրգիռ են քննարկել ոչ թե Հայաստանի շուրջ, այլ Հայաստանում ստեղծված իրավիճակը, Շիրինյանն ասաց. «Իրենք ով են, որ նման բաներ քննարկեն, Հայաստանում կա լեգիտիմ իշխանություն: Եթե տեսնում եք՝ այս ծանր իրավիճակում էլ ժողովուրդը բավականին հանգիստ է: Հայաստանի պրոբլեմն իրենք են, իրենք գնում են, պրոբլեմը լուծվում է: Ընդ որում, իրենք պրոբլեմը ստեղծում են այն ժամանակ, երբ Հայաստանի ղեկավարությունը փորձում է ստանալ Արևմուտքի աջակցությունն ընդդեմ ռուս-ադրբեջանական ագրեսիայի»:
Քաղաքագետն անդրադարձավ նաև մտահոգություններին, թե այդ գործիչները հեղաշրջման փորձ կարող են անել. «Դրանք ով են, որ հեղաշրջում անեն, ո՞նց են անելու հեղաշրջում: Նենսի Փելոսին եկավ ի՞նչ ասեց, ասեց՝ Հայաստանում ժողովրդավարությունն անշրջելի է, և դա Հայաստանի շահերին 100 տոկոսով համապատասխանող բանաձև է: Այնպես որ իրենց փոլոր բորձերը դատապարտված են ձախողման, իրենք վերակենդանացման մի շանս ունեն. Եթե Ռուսաստանը հաղթում է Ուկրաինայում, իրենք կարող են Հայաստանն արյան բաղնիքի վերածել, իրենք դա կանեն: Բայց հիմա որևէ մեկը հավատո՞ւմ է, որ Ռուսաստանը կարող է հաղթել: Հռոմեական Կայսրությունը մեռավ, Ռուսաստանն ինչի՞ պետք է ապրի: Դա կրեմլյան դավադիրների սխոդկա է, ոչ ավելին»,-ընդգծեց Լևոն Շիրինյանը:
