Ղրղզստանը նախաձեռնել է Տաջիկստանին ՀԱՊԿ-ից հեռացնելու ընթացակարգ։ Այս մասին հայտարարել է Ղրղզստանի անվտանգության խորհրդի քարտուղար Մարատ Իմանկուլովը։
«Այո, մենք նախաձեռնել ենք այս հարցը։ Մենք արդեն մի քանի անգամ բարձրացրել ենք ու պատրաստվում ենք նորից բարձրացնել։ Մասնակից պետությունների միջև ծագած հարցերը պետք է լուծվեն խաղաղ ճանապարհով։ Եթե ինչ-որ մեկը փորձի ուժ կիրառել, ապա առաջարկում ենք նրան հեռացնել կազմակերպությունից։ Ինչո՞ւ է դա անհրաժեշտ, երբ դառնում ես ՀԱՊԿ անդամ և ակնկալում պաշտպանություն արտաքին սպառնալիքից, բայց կազմակերպության ներսում կոնֆլիկտ ես ստանում երկրի հետ։ Ժամանակն է, որ մեր երկրները վերանայեն կանոնադրության որոշ հատվածներ, որոնք նախատեսում են նման պահեր» ,- ընդգծել է Ղրղզստանի Անվտանգության խորհրդի քարտուղարը։
Քաղաքագետ Ռուբեն Մեհրաբյանի կարծիքով՝ ՀԱՊԿ-ում առկա մթնոլորտը շատ օրինաչափ է․ «Այդ կառույցում մնացել է անձամբ Պուտինն ու իր սատելիտ արբանյակ Լուկաշենկոն։ Իսկ մնացածին ՀԱՊԿ-ը պետք է այնքան, որքան տրամվային՝ անվադողերը։ Հետևապես մարդիկ ձև են գտնում՝ ոնց անեն գլուխներն ազատեն։Ես կարծում եմ, որ որքան էլ կա կոնֆլիկտ Ղրղզստանի ու Տաջիկստանի միջև ու Ղրղզստանը հարուցել է գործընթաց ընդդեմ Տաջիկստանի, պետք է տաջիկները շնորհակալ լինեն Ղրղզստանին։ Ղրղզստանն ինքն իր համար էլ պետք է նման գործընթաց նախաձեռնի, Հայաստանն ու Ղազախստանը՝ ևս։ Ի վերջո մենք տեսնում ենք, որ ՀԱՊԿ կոչված հապավման մեջ բոլոր չորս տառերն էլ բովանդակազուրկ են։ Այնտեղ հավաքական ոչինչ չկա, անվտանգություն չկա, պայմանագիրը չունի ավելի մեծ քաշ, քան այն թուղթն է, որի վրա այն զետեղված է»,-«Առաջին լրատվական»-ի հետ զրույցում ասաց նա։
Ըստ մեր զրուցակցի՝ այս ամենի ղեկավարը Պուտինն է, իսկ նա այդ կազմակերպությունը դիտարկում է այնպես, ինչպես իր հարեմը։
Ռուբեն Մեհրաբյանը շեշտում է՝ Հայաստանը պետք է ՀԱՊԿ-ից դուրս գալու իր որոշումն արագացնի․ «Ես իմ ելույթներում բազմիցս ասել եմ, Հայաստանը ոչ թե այն երկընտրանքի առաջ է՝ մնալ ՀԱՊԿ-ում, թե ոչ, այլ Հայաստանի երկընտրանքը հետևյալն է՝ կա՛մ ՀԱՊԿ, կա՛մ զենք, կա՛մ ՀԱՊԿ, կա՛մ պետություն, կա՛մ ՀԱՊԿ, կա՛մ անվտանգություն, ՀԱՊԿ կամ զարգացում։ Այդ երկընտրանքն է, որը լուծվում է ՀԱՊԿ-ից դուրս գալով»։
Սոցիոլոգ Կարեն Սարգսյանը գտնում է՝ Հայաստանին Ղազախստանի ու Տաջիկստանի խնդիրները չպետք է մտահոգեն և մենք այս գործընթացում որևէ մասնակցություն չպետք է ունենանք։
Ըստ Սարգսյանի՝ մենք օր առաջ պետք է դուրս գանք այդ կազմակերպությունից․ « Պետք է հստակ քաղաքական ու քաղաքացիական դիրքորոշում ունենանք՝ մենք դուրս ենք գալիս ՀԱՊԿ-ից։ Եվ այստեղ բնավ կապ չունի՝ այդ կառույցը լավ է աշխատում, թե ոչ։ Այդ ամենը մեզ համար էական չէ։ Իմ դիրքորոշումը սա է․ ցանկացած այլ քաղաքական, քաղաքացիական, հասարակական գործիչ, որ ասում է՝ ո՛չ, մենք մնում ենք այնտեղ, ինձ հետ լուրջ խնդիր ունի»,-«Առաջին լրատվական»-ի հետ զրույցում ասաց նա։
