Այսօր Իրանի իսլամական խորհրդարանում ինտենսիվ քննարկումներ տեղի կունենան Ադրբեջանի՝ Հայաստանի սուվերեն տարածքի նկատմամբ հերթական ոտնձգությունների վերաբերյալ
Իրանի խորհրդարանում սեպտեմբերի 21-ին արտահերթ նիստ է հրավիրվել՝ քննարկելու հայ-ադրբեջանական սահմանին տիրող իրավիճակը։ Իրանահայ քաղաքական մեկնաբան Սահակ Շահմուրադյանը, «Առաջին լրատվական»-ի հետ զրույցում նկատեց, որ Ադրբեջանի օկուպանտ ուժերի կողմից Հայաստանի սուվերեն տարածքների դեմ սանձազերծած ներխուժման ֆոնին և ԱՄՆ Կոնգրեսի խոսնակ Նենսի Փելոսի Երևան կատարած այցին համահունչ, Հայաստանի հարավային հարևան և բարեկամ երկիր Իրանի Իսլամական Հանրապետության դիվանագիտական, քաղաքական և զանգվածային լրատվական լայն շրջանակներում արտակարգ ակտիվություն նկատվեց կովկասյան տարածաշրջանում տեղի ունեցող զարգացումների վերաբերյալ։
Նրա խոսքով՝ Իրանի որոշ քաղաքական շրջանակներ դժկամությամբ ու դժգոհությամբ արձագանքեցին ԱՄՆ Կոնգրեսի խոսնակ Նենսի Փելոսի` Երևան կատարած այցին և նրա ունեցած հանդիպումներին։
«Ընդհանրապես Իրանի իշխանությունների շրջանակներում այնքան էլ հաշտ չեն ամերիկացի պետական պաշտոնյաների և հատկապես Իսրայելի պաշտոնյաների՝ տարածաշրջան այցով, սա նորմալ երևույթ է իրանական քաղաքա-դիվանագիտական համակարգում»,-ասաց Շահմուրադյանը՝ հավելելով, որ մյուս կողմից հետաքրքիրն այն է, որ Ադրբեջանի ագրեսիայի և անպատասխանատու քայլերը հանգեցրել են նրան, որ իրանական բանակը և ԻՀՊԿ-ի ստորաբաժանումները և զինտեխնիկան կրկին շարժվեն դեպի երկրի հյուսիս-արևմտյան սահմանները, այնտեղի անվտանգությունը և սահմանային անձեռնմխելիությունը պաշտպանելու համար։ Շահմուրադյանը կարևորում է այն, որ իրանական պաշտպանական և զինվորական համակարգի բարձրաստիճան հրամանատարները հերթական հայտարարություններով ու կոչերով անուղղակիորեն Ադրբեջանի ռեժիմին նախազգուշացրել են տարածաշրջանում զերծ մնալ ագրեսիվ քայլերից, որը կարող է խաթարել տարածաշրջանի կայունությունն ու խաղաղությունը և հատկապես Իրանի ազգային անվտանգությունն ու տարածքային ամբողջականությունը։
Շահմուրադյանի խոսքով՝ հետաքրքիր մի այլ զարգացում նաև տեղի ունեցավ Իրանի մեդիադաշտում, որին անմիջապես հաջորդեց իրանական իշխանության պետական անվտանգության և կառավարության արձագանքին դիվանագիտական և պետական հարթակում․ «Հատկանշական է, որ սեպտեմբերի 18-ին Կովկասյան հարցերի հանրահայտ փորձագետ՝ դկտ. Ահմեդ Քազեմին Իրանի հեռուստատեսային «Սորայա» ուղղակի եթերում տեղի ունեցած քննարկման ժամանակ շատ դիպուկ շեշտադրությամբ ասաց, որ Ադբեջանի ռեժիմի կողմից բարձաձայնվող այսպես կոչված «Զանգեզուրի կեղծ միջանցքը» կամ «ՆԱՏՕ-ի թուրանական միջանցքը» Բրիտանիայի և Իսրայելի աշխարհաքաղաքական կեղծ նախագիծ է Իրանի հյուսիս-արևմուտքում գտնվող Կովկասի կարևոր տարածաշրջանում, որտեղ այս նախագծում գործակալի և գործադիրի դեր են խաղում Թուրքիայի և Ադրբեջանի կառավարությունները։ Նա նշեց որ այս նախագիծը ղեկավարվում է իսրայելական գաղտնի գործակալալն շրջանակների կողմից, որը միտում ունի մեկուսացնելով Իրանին տարածաշրջանում, Իրանին զրկել դեպի Եվրոպա և Ռուսաստան, ինչպես նաև Կենտրոնական Ասիայի երկրների և Չինաստանի հետ հաղորդակցական և էներգակիրների տարանցման հնարավորություններից և Իրանին կտրել Հայաստանի հետ կապվելու բոլոր ցամաքային և երկաթուղային բոլոր ճանապարհներից»։
Անդրադառնալով վաղը Իրանի մեջլիսում կայանալիք արտահերթ նիստին՝ Շահմուրադյանը նշեց, որ Իրանի Իսլամական խորհրդարանի Ազգային անվտшնգության և արտաքին քաղաքականության հանձնաժողովի ղեկավար Վահիդ Ջալալզադեն ասել է, որ Իսլամական Հանրապետության բարձրաստիճան պաշտոնյաները, Ազգային անվտանգության բարձրագույն խորհուրդը, ինչպես նաև արտաքին գործերի նախարարությունը և խորհրդարանը ցանկանում են լրջորեն զբաղվել այս հարցով և սեպտեմբերի 24-ին իսլամական խորհրդարանը լրջորեն զբաղվելու են այս օրակարգով․ «Վաղն ակնկալվում է Իրանի իսլամական խորհրդարանում ինտենսիվ քննարկումներ տեղի կունենան Ադրբեջանի Հանրապետության կողմից Հայաստանի սուվերեն տարածքի նկատմամբ հերթական ոտնձգությունների վերաբերյալ և այդ քայլերի արդյունքում տարածաշրջանի կայունության և հատկապես Իրանի ազգային անվտանգության դեմ ուղղված սադրիչ գործողություններն կանխելու և խիստ դատապարտելու հարցերի շուրջ։ Հայկական ԶԼՄ-ին և Իրան-Հայաստան խորհրդարանական բարեկամական հանձնաժողովների և Իրանում Հայաստանի դեսպանության ուշադրությունը հրավիրում եմ այս կարևոր հարցի շուրջ, որպեսզի բոլոր հնարավորություններով և միջոցներով փորձեն կապ պահել Իրանի խորհրդարանի լրատվական բաժնի և խորհրդարանականների հետ քննարկումները լուսաբանելու և համարժեք ձևով համագործակցելու Հայաստանի բարեկամ երկիր ԻԻՀ պաշտոնյաների հետ տարածաշրջանային և սահմանային անվտանգությունը ապահովելու և տարածաշրջանում կայունությունն ու խաղաղությունը պահպանելու կարևոր գործում միասնական փորձերն ու ջանքերը ընդլայնելու ուղղությամբ։
